Kryetari i PDK-së, Bedri Hamza, ka dalë me një deklaratë publike në rrjetet sociale, duke e komentuar ofertën e kryeministrit Albin Kurti në lidhje me presidentin.

Ai ka thën se po shohin sërish përpjekje për t’ia hedhur fajin opozitës për dështimin e zgjedhjes së presidentit.

“Prej gati dy vitesh, vendi po përballet me bllokada politike, jo për mungesë mundësish, por si pasojë e kësaj qeverisjeje të papërgjegjshme. Edhe sot, në vend të reflektimit, po vazhdojnë fajësimet dhe manipulimet e zakonshme. “Ofertat” në minutat e fundit nuk janë gjë tjetër veçse lojë politike për t’u arsyetuar para qytetarëve, jo përpjekje serioze për të ofruar zgjidhje. Qëndrimi ynë ka qenë, është dhe mbetet parimor”, ka shkruar Hamza në “Facebook”.

Kryetari i Drenasit, Ramiz Lladrovci, duke folur për çështjen e presidentit, ai ka theksuar se mund të bëhet befasi nga tri partitë politike, duke e emëruar një kandidat konsensual e jo tre, i cili mund të dilte si emër deri në mbrëmje dhe të ndaleshin spekulimet për Presidentin dhe kërcënimi i zgjedhjeve.

“Një kandidat si Murat Jashari, do të ishte kandidat përtej matematikave ekzistuese”, ka shkruar Lladrovci në Facebook.

Postimi i tij:

Sa më larg atdheut, ai bëhet më i dashur. Në këtë fundjavë, leximi i lajmeve nga Gjermania, po ma shton dëshpërimin, pse nuk kemi fuqi përbashkuese për ecje përpara. Pse dikush duhet të duket më i rëndësishëm se Kosova. Kushdo e vendosi veten mbi Kosovën, nuk la gjurmë të mirë.

Me të drejtë, partitë politike nuk e shqyrtuan propozimin e sotëm të pozitës. Si asnjë herë më parë, në politikën tonë duket i largët koncepti marrëveshje dhe konsensus. Lojërat politike kanë mund të ndalen kur qarkullonin emrat e Glaukut, Albulenës e ndonjë tjetër, para disa muajve.

Po, mund të bëhet befasi nga tri partitë politike, duke e emëruar një kandidat konsensual e jo tre, i cili mund të dilte si emër deri në mbrëmje dhe të ndaleshin spekulimet për Presidentin dhe kërcënimi i zgjedhjeve. Një kandidat si Murat Jashari, do të ishte kandidat përtej matematikave ekzistuese.

Ndryshe, keqpërdorimi i zgjedhjeve për motive të dobëta, do të jetë kryefjalë e udhëheqësve aktualë, të katër partive në Parlament. Pa dashur të bëj gjykatësin, PDK është me më pak faj, megjithëse mund të ulë tensionet, duke dhënë emrin e kandidatit për president.

Policia e Kosovës, përkatësisht Drejtoria për Bashkëpunim Ndërkombëtar Policor, në koordinim dhe bashkëpunim me njësitet tjera relevante të Policisë së Kosovës dhe institucionet e drejtësisë, me datat 23 dhe 24 prill 2026, kanë realizuar me sukses ekstradimin e dy personave të kërkuar nga drejtësia, të cilët ishin të shpallur në kërkim ndërkombëtar përmes INTERPOL-it. Të dyshuarit kërkoheshin për dy raste të ndara “Vrasje në tentativë”

Paraprakisht të dyshuarit ishin arrestuar nga autoritete e shteteve përkatëse në Gjermani dhe Francë dhe ekstradimet u realizuan bazuar në ligjet në fuqi dhe bashkëpunimit të ngushtë mes institucioneve të Republikës së Kosovës dhe shteteve prej nga u ekstraduan të kërkuarit.

Ministri i Financave, Hekuran Murati, tha se sot opozita votoi kundër trajtimit në seancë plenare të rishikimit të buxhetit.

“Ky rishikim do të mundësonte financimin e Pakos për Përballje me Inflacionin 2.0, në vlerë prej 200 milionë eurove”, ka shkruar Murati.

Ai ka theksuar se kjo pako mbështetëse do të ishte një ndihmë e shumëpritur për të lehtësuar barrën e familjeve, por ja që partitë opozitare mendojnë ndryshe fatkeqësisht.

Kryetari i Partisë Demokratike të Kosovës, Bedri Hamza, ka bërë të ditur se partia e tij nuk do të propozojë emra për president, pas ofertës së Vetëvendosjes që PDK-ja dhe LDK-ja të nxjerrin tre emra për kandidatë për president.

Propozimin e ri të VV-së, ai e ka quajtur manovër të kryeministrit Albin Kurti.

“Ne jemi parti të ndryshme. PDK-ja e LDK-ja janë subjekte në vete. AAK-ja është në vete. S’e ka ftuar fare. Me LDK-në ka tjera oferta, me PDK-në kemi diskutuar për presidentin. S’është çështje e rehatimit të individit, por çështje serioze që ka mundur të diskutohet në tavolinë kur ishim bashkë, por s’ka pasur seriozitet nga VV-ja e s’ka as tash”, ka thënë ai në holl të Kuvendit para seancës së jashtëzakonshme.

Deputeti i VV-së, Agim Bahtiri, ka thënë se opozita tashmë e ka një ofertë të mirë nga LV për president.

“Tani, për ju është edhe një ofertë publike, shumë e sinqertë, e shumë njerëzore, e cila iu dedikohet juve. Në total i keni 3 oferta dhe 3 mundësi që të propozoni kandidatët e mundshëm për President të vendit”, ka shkruar në Facebook Bahtiri.

Postimi i tij:

Të dashur kolegë deputet të partive opozitare,

Çdoherë iu kam thënë por ju nuk më besonit. Levizja Vetëvendosje asnjëherë nuk ka dashur që t’i ketë tri postet e larta shtetërore, por mosdëshira juaj për të propozuar një kandidat të mundshëm e serioz për President, na detyroi që ashtu siç e kërkon ligji t’i kemi dy kandidatët tonë. Por kjo nuk kaloi.

Tani, për ju është edhe një ofertë publike, shumë e sinqertë, e shumë njerëzore, e cila iu dedikohet juve. Në total i keni 3 oferta dhe 3 mundësi që të propozoni kandidatët e mundshëm për President të vendit.

Sot është në dorën tuaj se a shkon vendi në zgjedhje apo jo.

Prandaj, apeloj tek ju, për hir të atyre që kanë dhënë jetën e tyre, gjakun e tyre për të pasur shtet dhe institucione të shtetit të Kosovës, ju kisha lut mos shkelni mbi gjakun e tyre. Dilni mbi interesat personale e partiake, dhe gjeni 3 kandidatë të mundshëm më të mirët që i ka Kosova. Përkrahjen tonë do ta keni 100%

Kjo është tani në dorën tuaj.

AB