Tri ndeshjet e fundit të javës së 30-të në Albi Mall Superligën e Kosovës kanë sjellë fitore të skuadrave të kreut të renditjes. Drita ka realizuar fitore me rezultat bindës 3:0 ndaj Llapit, duke dëshmuar formë të qëndrueshme në fazën vendimtare të kampionatit.

Golat për Dritën u realizuan nga Besnik Krasniqi në minutën e 29-të, Abdoul Dante në fillimin e pjesës së dytë (47’), si dhe Veton Tusha në minutën e 63-të.

Me këtë fitore, Drita vazhdon të kryesojë renditjen me 57 pikë, pesë më shumë se ndjekësi më i afërt, Ballkani.

Ky i fundit, po ashtu, ka shënuar fitore me rezultat 3:0, duke e mposhtur Ferizajn, në Suharekë dhe duke mbajtur të hapur garën për titull.

Suharekasit kaluan në epërsi në pjesën e parë me golin e Giovanni-t në minutën e 22-të, ndërsa në pjesën e dytë shënuan edhe Valentin Serebe (80’) dhe Diar Vokrri (88’).

Në një tjetër ndeshje të rëndësishme të javës, Malisheva ka arritur një fitore dramatike në udhëtim ndaj Dukagjinit, falë golit të Xhemal Ibishit të shënuar në minutën e 93-të. Ky triumf i ka mundësuar Malishevës të ngjitet në pozitën e tretë me 46 pikë, duke kaluar Prishtinën dhe Gjilanin në renditje.

Prishtina aktualisht mban vendin e katërt me 45 pikë, ndërsa Gjilani renditet i pesti me 44 pikë. Dukagjini dhe Drenica ndajnë pozitat e mesit të tabelës me nga 38 pikë, ndërsa Llapi dhe Ferizaj mbeten në zonën e rrezikut me nga 33 pikë.

Për tri ditë radhazi Federata e Futbollit e Kosovës ishte nikoqire e turneut ndërkombëtar “Moveup Europe Cup”. Ky aktivitet sportiv promovon përfshirjen, shëndetin dhe aktivitetin fizik për grupmosha specifike. Ky turne u organizua në kuadër të projektit evropian Erasmus “Moveup”, me mbështetjen dhe bashkëpunimin e FFK-së.

Në këtë edicion morën pjesë ekipe nga vende të ndryshme evropiane, përfshirë: Federatën e Futbollit të Rumanisë, Corporate Games nga Rumania e Margerita Sports nga Italia.
Gjatë këtyre tri ditëve sa u zhvillua ky aktivitet, pjesëmarrësit patën mundësinë të garojnë në një atmosferë miqësore dhe motivuese, duke ndarë përvoja dhe duke forcuar lidhjet mes tyre përmes sportit.

Qëllimi kryesor i projektit “Moveup” është të promovojë pjesëmarrjen aktive në sport për meshkujt mbi moshën 50 vjeçare, femrat mbi moshën 40 vjeçare si dhe në mënyrë të veçantë për personat që jetojnë me diabet tip 2 dhe hipertension.
Ky projekt synon të rrisë ndërgjegjësimin për rëndësinë e aktivitetit fizik si një mjet efektiv për përmirësimin e shëndetit dhe cilësisë së jetës, duke ofruar një mundësi për aktivitet sportiv të sigurt dhe gjithëpërfshirëse për të gjithë pjesëmarrësit.

Organizimi i këtij turneu në Prishtinë dëshmon përkushtimin e Federatës së Futbollit të Kosovës për të mbështetur iniciativa që tejkalojnë dimensionin garues të sportit, duke e përdorur atë si mjet për mirëqenie, integrim social dhe bashkëpunim ndërkombëtar.

“Moveup Europe Cup 2026” u vlerësua si një sukses i madh organizativ dhe sportiv, duke lënë hapësirë për aktivitete të mëtejshme dhe edicione të ardhshme edhe më gjithëpërfshirëse.

Sulmuesi i Liverpoolit, Mohamed Salah, do të mungojë për pjesën e mbetur të sezonit pas një dëmtimi serioz në muskujt e pasëm të kofshës.

Lajmi është bërë i ditur nga drejtori i kombëtares së Egjiptit, Ibrahim Hassan, i cili konfirmoi se lojtari ka pësuar një çarje dhe do të ketë nevojë për rreth katër javë rikuperim.

33-vjeçari u lëndua gjatë fitores 3:1 në Premier League kundër Crystal Palace, duke u larguar nga fusha në minutën e 60-të mes duartrokitjeve të tifozëve.

Deri tani, klubi anglez nuk ka dhënë një njoftim zyrtar për gjendjen e tij, transmeton Klankosova.tv.

Lëndimi vjen në një moment delikat për Salah, i cili më herët ka bërë të ditur se do të largohet nga Liverpooli në fund të sezonit, duke i dhënë fund një periudhe nëntëvjeçare të mbushur me suksese dhe trofe. Ndeshja e fundit e sezonit ndaj Brentford FC pritet të shërbejë si një lamtumirë simbolike për tifozët.

“The Reds”, ka ende disa sfida të rëndësishme përpara, përfshirë përballjet ndaj Chelsea FC, Manchester United dhe një transfertë kundër Aston Villa.

Pavarësisht dëmtimit, Salah mbetet një nga golashënuesit më të mëdhenj në historinë e klubit, duke regjistruar 12 gola dhe 9 asistime në të gjitha garat këtë sezon.

Sipas Ibrahim Hassan, sulmuesi pritet të rikthehet në kohë për FIFA World Cup 2026, ku Egjipti do të përballet me Belgjikën, Zelandën e Re dhe Iranin në Grupin G.

Objektivi kryesor i Salah është të rikuperohet plotësisht dhe të shmangë përsëritjen e problemeve fizike që e kanë ndjekur në turnetë e mëparshëm.

Drenica ka vazhduar ecurinë pozitive në AlbiMall Superligën e Kosovës, duke regjistruar edhe një fitore të rëndësishme në kuadër të xhiros së 30-të.

Skuadra kuqezi nga Skenderaj triumfoi në udhëtim ndaj Prishtinës së Re me rezultat 3:2, në një përballje të luftuar që u vendos në detaje. Ndeshja u zhvillua në Kampin Nacional të FFK-së në Hajvali, në terrenin me bar sintetik.

Kreshnik Uka ishte lojtari më i dalluar i takimit, duke realizuar dy gola për mysafirët, ndërsa një tjetër gol për Drenicën e shtoi Jeton Krasniqi.

Për Prishtinën e Re realizuan Kargbo dhe Vedji, derisa kjo humbje vjen pas një serie pozitive prej një fitoreje dhe një barazimi, duke e ndalur ritmin e tyre në këtë fazë të rëndësishme të kampionatit.

Falë kësaj fitoreje, Drenica shkon në kuotën e 38 pikëve dhe mban pozitën e shtatë në renditje, duke krijuar distancë prej pesë pikësh nga Ferizaj dhe Llapi, që kanë një ndeshje më pak të zhvilluar.

Ndërkohë, Prishtina e Re mbetet në fund të tabelës me 28 pikë.