Kryesuesi i delegacionit të Kuvendit të Republikës së Kosovës në Asamblenë Parlamentare të Këshillit të Evropës dhe njëherësh Nënkryetari i Kuvendit, Ardian Gola, po merr pjesë në takimin e Rrjetit të Parlamentarëve për Promovimin e Zbatimit të Aktgjykimeve të Gjykatës Evropiane për të Drejtat e Njeriut, i cili po mbahet më 12 dhe 13 nëntor 2026 në Hagë të Holandës.

Takimi organizohet në kuadër të Komitetit për Çështje Ligjore dhe të Drejta të Njeriut të APKE-se dhe po mbahet në ambientet e Dhomës së Përfaqësuesve të Holandës.

Gjatë punimeve të këtij takimi parlamentarët nga vendet anëtare dhe delegacionet e Këshillit të Evropës po trajtojnë çështje kyçe që lidhen me forcimin e mekanizmave parlamentarë për mbikëqyrjen dhe zbatimin efektiv e në kohë të aktgjykimeve të Gjykatës Evropiane për të Drejtat e Njeriut dhe bashkëpunimin ndërinstitucional.

Gjithashtu po trajtohet edhe roli i parlamenteve kombëtare dhe të Bashkimit Evropian në avancimin e standardeve evropiane të të drejtave të njeriut dhe sundimit të ligjit.

Po ashtu, dje deputetët zhvilluan një vizitë në Gjykatën Penale Ndërkombëtare (ICC), ku u pritën nga zyrtarë të lartë të këtij institucioni.

Gjatë takimit u diskutua rreth rëndësisë së bashkëpunimit të ngushtë ndërmjet Asamblesë Parlamentare të Këshillit të Evropës, parlamenteve kombëtare dhe kësaj gjykate.

Pjesëmarrja e kryesuesit te delegacionit të Kuvendit të Kosovës në këtë takim riafirmon përkushtimin e Kuvendit të Republikës së Kosovës për harmonizimin e praktikave parlamentare dhe ligjore me standardet e Këshillit të Evropës dhe të drejtave të njeriut.