Kryeministri i Kosovës, Albin Kurti, ka bërë të ditur se në selinë e Organizatës së Kombeve të Bashkuara në New York është takuar me Përfaqësuesen e Lartë të Bashkimit Evropian për Politikë të Jashtme dhe Siguri dhe Zëvendëspresidenten e Komisionit Evropian, Kaja Kallas.
Kurti tha se në takim ka kërkuar përkrahjen e Bashkimit Evropian për të ushtruar trysni ndaj Serbisë që Millan Radoiçiq dhe pjesëtarët e tjerë të grupit që Kosova e konsideron terrorist, të përballen me drejtësinë në Kosovë.
Ai e ka lidhur këtë çështje me sulmin në Banjskë të Zveçanit, duke theksuar se më 24 shtator bëhen tre vjet nga sulmi ku u vra rreshteri i Policisë së Kosovës, Afrim Bunjaku.
“Millan Radoiçiq dhe pjesëtarët e tjerë të grupit terrorist paramilitar, të cilët po mbrohen nga presidenti i Serbisë, teksa i ofrojnë mbrojtje dhe shërbime, duhet të përballen me drejtësinë në Kosovë”, ka shkruar Kurti.
Në takim, sipas Kurtit, është diskutuar edhe aktgjykimi i shkallës së parë të Dhomave të Specializuara ndaj ish-drejtuesve të UÇK-së.
Ai ka shprehur shqetësimin e tij për, siç e ka cilësuar, “dënimet e rënda dhe të padrejta”, duke thënë se procesi gjyqësor ende nuk ka përfunduar dhe se Kosova do të angazhohet në shkallën e apelit.
Kurti ka mbrojtur gjithashtu luftën e UÇK-së, duke thënë se ajo lindi si përgjigje ndaj represionit, vrasjeve, masakrave dhe dëbimeve masive nga Serbia.
Ai ka akuzuar Serbinë për krime gjatë luftës dhe ka kërkuar që përgjegjësit për krimet e kryera ndaj qytetarëve të Kosovës të përballen me drejtësinë.
Një tjetër çështje e ngritur në takim, sipas Kurtit, ishte situata e shqiptarëve në Luginën e Preshevës.
Ai ka thënë se shqiptarët në Serbi përballen me diskriminim dhe nënpërfaqësim në institucione, ndërsa ka akuzuar autoritetet serbe për “spastrim etnik administrativ” përmes heqjes së adresave.
Kurti ka theksuar se Kosova mbetet e përcaktuar për integrimin evropian dhe euro-atlantik dhe se është e linjëzuar me politikën e jashtme dhe të sigurisë së BE-së.
Në këtë kuadër, ai ka thënë se përgjigjja e Brukselit duhet të jetë dhënia e statusit të vendit kandidat për anëtarësim në Bashkimin Evropian.