Kryetari i Odës Ekonomike të Kosovës, Lulzim Rafuna, ka pritur në takim përfaqësues të bizneseve që operojnë në sektorin e gurëthyesve, me qëllim diskutimin e sfidave me të cilat po përballen në procesin e pajisjes me licenca dhe kërkesat nga institucionet përkatëse.

Në takim, ku morën pjesë edhe ekspertë juridikë, u diskutuan çështjet kryesore që ndikojnë në funksionimin e këtyre bizneseve, përfshirë vonesat administrative, pasigurinë juridike, vështirësitë në operim dhe ndikimin e tyre në punësim dhe zhvillimin ekonomik.

Përfaqësuesit e bizneseve theksuan nevojën për një bashkëpunim më të koordinuar institucional dhe për zgjidhje konkrete që do të mundësonin vazhdimësinë e veprimtarisë së tyre dhe zhvillimin e qëndrueshëm të sektorit.

Oda Ekonomike e Kosovës ka theksuar se mbetet e përkushtuar në përfaqësimin dhe mbështetjen e bizneseve vendore, duke avokuar për një mjedis të favorshëm, të drejtë dhe konkurrues për zhvillimin e sektorëve të ekonomisë së Kosovës.