Përfaqësues të platformës qytetare “Liria ka Emër” kanë zhvilluar takim me kryetarin e Bashkësisë Islame të Kosovës, myftiun Naim ef. Tërnava.

Në takim u diskutua për organizimin e Marshit për Liri, që do të mbahet më 12 shtator, nga ora 14:00, në sheshin “Skënderbeu” në Prishtinë, si dhe për rëndësinë e bashkimit qytetar në këto ditë vendimtare.

Myftiu Tërnava shprehu mbështetjen e tij për këtë nismë dhe gatishmërinë për të kontribuar në mbarëvajtjen e marshit, duke përcjellë një mesazh solidariteti, uniteti dhe respekti për vlerat e luftës së Ushtrisë Çlirimtare të Kosovës.

Platforma “Liria ka Emër” e falënderon Myftiun Tërnava dhe Bashkësinë Islame të Kosovës për pritjen, mbështetjen dhe solidarizimin.

Po ashtu përfaqësuesit e platformës qytetare “Liria ka Emër” kanë zhvilluar takim edhe me ipeshkvin e Ipeshkvisë së Kosovës, Imzot Dodë Gjergji, i cili ka shprehur mbështetjen e tij për Marshin për Liri, duke vlerësuar rëndësinë e unitetit, solidaritetit dhe qëndrimit të përbashkët në mbështetje të vlerave mbi të cilat është ndërtuar liria e Kosovës.

Platforma qytetare “Liria ka Emër” ka falënderuar Ipeshkvin Dodë Gjergji për pritjen, mbështetjen dhe solidarizimin me këtë nismë qytetare.

Marshi për Liri do të mbahet më 12 shtator, nga ora 14:00, në sheshin “Skënderbeu” në Prishtinë.