Kryetari i Lidhjes Demokratike të Kosovës (LDK), Lumir Abdixhiku, ka reaguar pas tërheqjes së Bekim Sejdiut nga gara për president të Republikës së Kosovës.

Abdixhiku ka vlerësuar se Sejdiu ka treguar dinjitet përballë, siç e ka quajtur ai, “histerisë politike”, duke theksuar se karakteri i tij do ta bënte atë zgjedhjen e duhur për president.

“Tërheqja e tij, përballë histerisë politike, dëshmon pikërisht pse një njeri me karakterin e tillë do të ishte zgjedhja e duhur për President”, ka shkruar Abdixhiku.

Ai ka shprehur keqardhje që Kosova aktualisht nuk ka president dhe se, në vend të një zgjidhjeje, vendi po përballet me kaos politik, bllokadë dhe mundësinë e zgjedhjeve të reja.
Abdixhiku ka kritikuar gjithashtu sulmet ndaj Sejdiut, duke thënë se ai u bë padrejtësisht shënjestër e “sulmeve të paprecedenta” dhe se përbaltja ndaj tij kishte të bënte më së paku me figurën e tij.

Sipas tij, urrejtja dhe inati personal janë bërë më të forta se përgjegjësia ndaj vendit.
“Sa shumë kemi nevojë për njerëz të mirë në këtë vend. Sa lehtë i hedhim poshtë”, ka shkruar Abdixhiku.

Në fund, kreu i LDK-së e ka cilësuar situatën politike si “PISA politike të Kosovës”, duke kritikuar bllokadat dhe dështimin për të gjetur zgjidhje institucionale.

“Të faleminderit, Bekim, për gatishmërinë dhe dinjitetin e treguar në vazhdimësi. Në kohën e politikës së sotme, këto virtyte janë vlerë”, ka përfunduar Abdixhiku.