Policia e Kosovës ka reaguar ndaj raportimeve në disa portale, të cilat pretendojnë se Kosova po “blindohet” në prag të vendimit të Gjykatës Speciale në Hagë dhe se tashmë është bërë i ditur plani policor për 16 shtatorin.

Policia ka sqaruar se planifikimi dhe ndërmarrja e masave të sigurisë në raste kur priten zhvillime, aktivitete apo pjesëmarrje e madhe e qytetarëve janë pjesë e procedurave të rregullta policore.
Sipas Policisë, këto masa kanë për qëllim menaxhimin e sigurt të tubimeve, ruajtjen e rendit dhe sigurisë publike, menaxhimin e trafikut rrugor dhe garantimin e mbarëvajtjes së aktiviteteve.

Në njoftim thuhet se, gjatë vlerësimeve dhe planifikimeve policore, merret parasysh edhe mundësia që individë apo elemente të caktuara, përfshirë persona nga jashtë vendit, të tentojnë të shfrytëzojnë grumbullimet e mëdha për provokime, incidente apo veprime destabilizuese.

Policia thekson se bëhet fjalë për masa parandaluese dhe standarde, të cilat aplikohen në varësi të numrit të pritshëm të pjesëmarrësve dhe vlerësimit të përgjithshëm të situatës.

Në fund, Policia e Kosovës u ka bërë thirrje qytetarëve dhe mediave që t’u referohen vetëm informacioneve zyrtare dhe të shmangin përhapjen e pretendimeve të pakonfirmuara, të cilat mund të ndikojnë në perceptimin e sigurisë dhe të shkaktojnë shqetësim të panevojshëm në opinion.