Kryetari i Prishtinës, Përparim Rama, ka shprehur pikëllimin e tij për humbjen tragjike të jetës së një punëtori në aksidentin e ndodhur sot në një vendpunishte ndërtimore në rrugën “Holger Petersen”.

Përmes një postimi, Rama u ka shprehur ngushëllimet më të sinqerta familjarëve të viktimës, ndërsa të lënduarit i ka uruar shërim sa më të shpejtë.

Ai ka falënderuar Brigadën Profesionale të Zjarrfikjes dhe Shpëtimit, Policinë e Kosovës, ekipet e Urgjencës Mjekësore, Njësinë për Reagim të Shpejtë dhe Siguri, si dhe Drejtorinë për Siguri dhe Emergjenca për reagimin e shpejtë dhe profesional gjatë ndërhyrjes.

Rama theksoi se rrethanat e aksidentit po hetohen nga organet kompetente, ndërsa vlerësimi i respektimit të standardeve të sigurisë dhe mbrojtjes në punë është në kompetencë të Inspektoratit Qendror të Punës.

Sipas tij, humbja e një jete në vendin e punës është një tragjedi që duhet të shërbejë si kujtesë se siguria në punë duhet të jetë prioritet i panegociueshëm dhe standard që respektohet në çdo vendpunishte.