Presidenti i Shteteve të Bashkuara të Amerikës, Donald Trump, ka bërë të ditur se është duke zhvilluar një takim në Shtëpinë e Bardhë me këshilltarët e tij më të afërt, për të marrë një vendim përfundimtar lidhur me një marrëveshje të mundshme me Iranin.

Lajmin e ka konfirmuar vetë Trump përmes një postimi në platformën Truth Social, ku ka zbuluar edhe disa nga kushtet kryesore të marrëveshjes që po diskutohet.

“Do të zhvilloj tani një takim në Situation Room për të marrë një vendim final”, ka shkruar Trump në postimin e tij të gjatë të publikuar pak para orës 11:00 sipas kohës lokale në SHBA.

Sipas presidentit amerikan, një nga kushtet kryesore është që Irani të pranojë zyrtarisht se nuk do të zotërojë kurrë armë apo bomba bërthamore, raporton CNN, transmeton Klankosova.tv.

Trump po ashtu ka kërkuar që Ngushtica e Hormuzit të hapet menjëherë për qarkullimin detar, pa tarifa apo kufizime për anijet që kalojnë në këtë korridor strategjik ndërkombëtar.

Ai deklaroi gjithashtu se minat e vendosura nga Irani në këtë zonë detare duhet të hiqen menjëherë.

Në postimin e tij, Trump shtoi se bllokada amerikane ndaj ngushticës do të hiqet, duke lejuar anijet që kanë mbetur të bllokuara të rifillojnë lëvizjen normale.

Një tjetër çështje e ndjeshme në negociata mbetet stoku i uraniumit të pasuruar të Iranit.

Sipas Trump, materiali bërthamor do të merret nga Shtetet e Bashkuara dhe do të shkatërrohet në koordinim me autoritetet iraniane.

Presidenti amerikan bëri të ditur gjithashtu se aktualisht nuk do të ketë shkëmbim parash mes palëve, duke lënë të kuptohet se çdo lehtësim financiar për Iranin do të mbetet i pezulluar deri në një njoftim tjetër.

Deklaratat e Trump vijnë në një moment tensionesh të larta ndërkombëtare dhe pritet të kenë ndikim të madh në zhvillimet diplomatike dhe të sigurisë në Lindjen e Mesme.