Organizata Botërore Meteorologjike (OBM), agjenci e specializuar e Organizatës së Kombeve të Bashkuara (OKB), ka paralajmëruar se një fazë e re e fenomenit klimatik “El Nino” mund të nisë brenda javëve në vijim dhe të intensifikohet gjatë pjesës së mbetur të vitit 2026.

Sipas vlerësimeve të ekspertëve, rikthimi i këtij fenomeni natyror mund të ndikojë ndjeshëm në temperaturat globale, duke i shtuar presionin një planeti që tashmë po përballet me pasojat e ndryshimeve klimatike të shkaktuara nga aktiviteti njerëzor, raporton BBC, transmeton Klankosova.tv.

Meteorologët paralajmërojnë se kombinimi i ngrohjes globale me një El Nino të fuqishëm mund të sjellë pasoja të rëndësishme në shumë rajone të botës.

Mes efekteve të pritshme përmenden rritja e valëve ekstreme të të nxehtit, periudha më të gjata thatësire në disa zona, si dhe reshje intensive dhe përmbytje në rajone të tjera.

Sipas disa agjencive kombëtare të motit, ekziston mundësia që fenomeni i ri të shndërrohet në një nga El Nino-t më të fortë të regjistruar ndonjëherë, duke marrë përmasat e një të ashtuquajturi “super El Nino”.

Ekspertët po monitorojnë vazhdimisht kushtet klimatike në Paqësor, pasi ndryshimet në këtë rajon luajnë një rol vendimtar në zhvillimin e fenomenit dhe në ndikimin që ai mund të ketë në shkallë globale.

Çka është El-Nino?

El Nino është një fenomen natyror klimatik që shfaqet periodikisht kur ujërat sipërfaqësore në pjesën qendrore dhe lindore të Oqeanit Paqësor ngrohen më shumë se niveli normal.

Ky proces ndikon drejtpërdrejt në qarkullimin atmosferik dhe mund të ndryshojë modelet e motit në shumë pjesë të botës.

Historikisht, episodet e forta të El Nino-s kanë qenë të lidhura me temperatura rekord në nivel global, thatësira të gjera, zjarre pyjore, stuhi të fuqishme dhe reshje ekstreme, duke shkaktuar pasoja të konsiderueshme ekonomike dhe mjedisore.

Për këtë arsye, organizatat ndërkombëtare dhe qendrat meteorologjike po ndjekin me vëmendje zhvillimet e fundit, ndërsa ekspertët paralajmërojnë se muajt e ardhshëm mund të jenë vendimtarë për të kuptuar ndikimin real që do të ketë fenomeni i ri El Nino në klimën globale.