Komisioni për Punë të Jashtme dhe Diasporë, i kryesuar nga Arbëreshë Kryeziu Hyseni, ka zhvilluar një takim me ambasadoren e Suedisë në Kosovë, Åsa Pehrson, ku në fokus ishte bashkëpunimi dypalësh dhe procesi i integrimit evropian të Kosovës.

Gjatë takimit u diskutua edhe për rolin e diasporës, si dhe zhvillimet që ndikojnë në sigurinë dhe stabilitetin e Kosovës dhe rajonit.

Kryetarja e Komisionit, Arbëreshë Kryeziu Hyseni, falënderoi Suedinë për mbështetjen e vazhdueshme ndaj Kosovës, duke vlerësuar bashkëpunimin në reformat demokratike, bashkëpunimin ndërparlamentar dhe mbështetjen suedeze në procesin e anëtarësimit të Kosovës në Këshillin e Evropës.

Ajo shprehu shqetësimin për mosshqyrtimin e aplikimit të Kosovës për anëtarësim në Bashkimin Evropian, ndërsa kërkoi mbështetjen e Suedisë që çështja e marrjes së statusit të vendit kandidat të diskutohet gjatë vjeshtës.

Nga ana e saj, ambasadorja Pehrson vlerësoi përparimin e Kosovës dhe orientimin e saj proevropian, duke shprehur gatishmërinë për ta mbështetur vendin në përpjekjet për integrim evropian.

Ajo gjithashtu vlerësoi kontributin e diasporës kosovare në jetën ekonomike dhe kulturore të Suedisë, si dhe shprehu interesimin për promovimin e mundësive të investimeve në Kosovë për kompanitë suedeze.

Ndërkaq, anëtarët e Komisionit kërkuan angazhim të mëtejshëm të Suedisë për anëtarësimin e Kosovës në NATO, Bashkimin Evropian dhe Këshillin e Evropës, si dhe lobim te shtetet e BE-së që ende nuk e kanë njohur pavarësinë e Kosovës.
Në përfundim, palët rikonfirmuan gatishmërinë për vazhdimin dhe thellimin e bashkëpunimit.