“28 vjet më parë, ra heroikisht Komandanti Agron Rrahmani – Naseri, një nga figurat më të ndritura të luftës sonë çlirimtare dhe njëri ndër njerëzit që jetën ia kushtoi lirisë së popullit shqiptar”, kështu ka vlerësuar për ketë përvjetor të heroit Rrahmani, kryetari i Rahovecit, Smajl Latifi.

Kryetari Latifi ka theksuar se Agroni ishte nga ata burra që nuk u pajtuan kurrë me robërinë.

“Me ideal të pastër kombëtar, me zemër të madhe dhe guxim të rrallë, ai u bë pjesë e organizimit të hershëm të rezistencës së armatosur, duke u shquar si komandant i Njësitit të Parë Gueril “Rexhep Mala” të LKÇK-së. Bashkë me Bahri Fazliun – Gzimin dhe shumë veprimtarë të tjerë, ai i dha shpirt dhe drejtim luftës për çlirim, në kohën kur liria dukej larg, por besimi për të ishte më i madh se frika. Në përvjetorin e rënies së tij, e kujtojmë me nderim të thellë heroin që jetoi e luftoi me dinjitet, trimëri dhe përkushtim të pashoq për kombin. Vepra e Agron Rrahmanit mbetet frymëzim për brezat dhe dëshmi se liria e Kosovës u ndërtua mbi sakrificën e bijve më të mirë të saj. Lavdi e përjetshme heroit të kombit, Agron Rrahmani – Naseri! Lavdi të gjithë dëshmorëve dhe të rënëve për liri!”, ka shkruar Latifi.