Partia Demokratike e Kosovës ka nderuar të premten veprimtaren, mjeken dhe intelektualen, Flora Brovina.

Kryetari i PDK-së, Bedri Hamza, i shoqëruar nga deputetë, anëtarë të Kryesisë së PDK-së dhe bashkëpunëtorë, mori pjesë në Akademinë Përkujtimore dhe bëri homazhe në Kuvendin e Kosovës, në nderim të figurës së Flora Brovinës.

Ata vlerësuan kontributin e saj si mjeke, intelektuale dhe veprimtare që gjithë jetën ia kushtoi Kosovës dhe qytetarëve të saj.

“Për mua, për PDK-në dhe për të gjithë ata që patën fatin ta njohin, Flora Brovina do të mbetet përgjithmonë një simbol i qëndresës, i humanizmit dhe i atdhedashurisë”, ka theksuar kryetari Hamza.

Emri dhe vepra e Flora Brovinës mbeten dëshmi e një jete të jetuar me dinjitet dhe në shërbim të vendit, u tha në mbledhjen komemorative në nderim të mjekes, poetes, veprimtares dhe ish-deputetes së Kuvendit të Kosovës, Flora Brovina, e cila ndërroi jetë më 15 shtator, në moshën 76-vjeçare.
Në këtë tubim, bashkëveprimtarë, mjekë, ish-pjesëtarë të Ushtrisë Çlirimtare të Kosovës dhe familjarë të figurave të luftës folën për jetën dhe veprimtarinë e Brovinës, duke veçuar angazhimin e saj në mjekësi, humanizëm, letërsi dhe në periudhën e luftës në Kosovë.