Partia Demokratike e Kosovës e ka cilësuar si “të padrejtë dhe të papranueshëm” aktgjykimin ndaj Hashim Thaçit, Kadri Veselit, Jakup Krasniqit dhe Rexhep Selimit, duke thënë se do ta kundërshtojë atë “me të gjitha mjetet demokratike”.

Në një reagim pas shpalljes së aktgjykimit në Hagë, PDK-ja tha se vendimi përbën “goditje të rëndë” dhe pretendoi se ai mbështetet në materiale që partia i konsideron të fabrikuara dhe të nxitura nga Serbia me synim kriminalizimin e luftës së UÇK-së.

“Ky aktgjykim mund të jetë shkruar në Hagë. Por, historia e Kosovës është shkruar këtu, me sakrificë, gjak dhe luftë për liri. Dhe ajo nuk rishkruhet sot”, thuhet në reagim.

PDK-ja tha se aktgjykimi nuk është “fjala e fundit”, duke iu referuar vazhdimit të procesit gjyqësor.

“Ne për drejtësinë do të luftojmë deri në fund dhe për të vërtetën nuk do të heshtim kurrë”, tha PDK-ja, duke shtuar se synimi i saj mbetet lirimi i katër ish-krerëve të UÇK-së.