Kryetari i Komunës së Rahovecit, Smajl Latifi, ka përkujtuar 5 Majin – Ditën e Dëshmorëve të Kombit, duke nderuar sakrificën e atyre që dhanë jetën për lirinë e atdheut.

Përmes një aktiviteti përkujtimor, së bashku me familjarë të dëshmorëve, përfaqësues të OVL-UÇK, bashkëpunëtorë dhe qytetarë, Latifi tha se kujtimi për të rënët mbetet i përhershëm dhe udhërrëfyes për të ardhmen.

Ai theksoi se nderimi për dëshmorët nuk duhet të kufizohet vetëm në data përvjetore, por duhet të reflektohet në angazhimin e përditshëm për ndërtimin e një shteti të drejtë, të zhvilluar dhe të denjë për sakrificën e tyre.

“Sot nuk është vetëm një ditë kujtimi, por edhe një thirrje për përgjegjësi. Sa herë që punojmë për të mirën e përbashkët, ne forcojmë vlerat për të cilat ata ranë”, u shpreh ai.

Në fund, Latifi u shpreh se kujtimi për dëshmorët dhe heronjtë e atdheut do të mbetet i përjetshëm ndër breza, duke e cilësuar 5 Majin si një nga datat më të rëndësishme të historisë kombëtare.