Zelensky në Tiranë më 28-29 shkurt, Rama: Shqipëria qëndron krah për krah me Ukrainën

“Ukraina, një krim lufte”, ishte ekspozita me dëshmi pamore e agresionit rus e çelur në Qendrën për Hapje dhe Dialog në Kryeministri të Shqipërisë.

Për kreun e qeverisë, kjo ekspozitë vjen në vigjilje të vizitës së Presidentit ukrainas në Tiranë Volodymyr Zelensky, i cili do jetë pjesë e samitit të vendeve të rajonit të Ballkanit Perëndimor 28-29 Shkurt.

“Vizitë e cila është nga njëra anë një vizitë bilaterale, por nga ana tjetër është edhe një vizitë, e cila do të kulmojë me një Samit të vendeve të Evropës Juglindore për Ukrainën ku do të kemi të ftuar një numër të konsiderueshëm liderësh të kësaj zone të Evropës dhe ku presidenti Zelensky natyrisht është bashkë me ne si bashkë-organizator së bashku me mua, për këtë aktivitet që në kontekstin e sotëm ka, sipas meje, një rëndësi të posaçme”, është shprehur kryeministri Edi Rama.

Edhe njëherë Rama ripërsëriti mbështetjen dhe solidaritetin e Shqipërisë ndaj popullit ukrainas.