Vrasja e policit në Kaçanik, Hoxha: Janë intervistuar disa persona

Drejtori i Përgjithshëm i Policisë së Kosovës, Gazmend Hoxha, ka treguar se institucioni që drejton është duke i marrë të gjitha veprimet e mundshme për të zbardhur vrasjen e policit Muhamed Lika, e cila ka ndodhur të martën.

Në një prononcim për ‘Tëvë1’, ai ka thënë se policia ka intervistuar disa persona për këtë çështje.

Sipas tij, po punohet në ekzaminimin e dëshmive.

“Është një rast shumë i rëndë që ka ndodhur para dy netësh. Policia ka dalë menjëherë në vendin e ngjarjes. Ka intervistuar disa persona si dëshmitare të mundshëm. Po punohet në ekzaminimin e dëshmive në pjesën teknike. Akoma nuk kemi arritur për të verifikuar se a ka ndonjë ndërlidhje mes rastit të vrasjes dhe problemit të mëhershëm”, ka deklaruar Hoxha.

Kryeprokurori i Prokurorisë Themelore në Ferizaj, Burim Çerkini, bëri me dije të mërkurën se rreshteri i Policisë së Kosovës, Muhamet Lika, u vra nga dy persona në shkallët e ndërtesës ku banonte teksa po kthehej nga puna, dhe se autorët e dyshuar ndodhen në arrati.

Duke folur në një konferencë për medie në Prishtinë, Çerkini tha se autoritetet janë duke punuar për t’i zbardhur motivet dhe arsyet e vrasjes.

Sindikata e Policisë së Kosovës ka dënuar vrasjen e policit, duke thënë se “ky akt i rëndë është një atentat i drejtpërdrejtë ndaj sigurisë publike, ligjit dhe shtetit të Kosovës”.