Brazili ka demonstruar forcën e tij të vërtetë në ndeshjen e fundit të Grupit C, duke mposhtur Skocinë me rezultatin e pastër 3-0 dhe duke konfirmuar statusin e pretendentit kryesor për titullin.

“Seleçao” e nisi takimin me grintë, duke zhbllokuar shifrat që në minutën e 7’ me anë të Vinícius Júnior, i cili ishte protagonist absolut i pjesës së parë. Përpara se skuadrat t’i drejtoheshin dhomave të zhveshjes, ishte sërish Vinícius ai që dyfishoi avantazhin në minutën e 45’+3, duke i dhënë një qetësi të madhe ekipit të tij. Në pjesën e dytë, ritmi nuk ndryshoi dhe Matheus Cunha vulosi fitoren në minutën e 60’, duke shuar çdo shpresë për një reagim të skocezëve.

Ky sukses i rëndësishëm i siguron Brazilit kryesimin e Grupit C me 7 pikë të grumbulluara. Pavarësisht se e ndan vendin e parë me Marokun për nga numri i pikëve, “Seleçao” arrin të mbajë kreun falë një golavarazhi më të mirë, duke konfirmuar epërsinë e tyre teknike në këtë fazë. Me këtë kualifikim bindës, Brazili avancon më tej si lider i grupit, duke dërguar një mesazh të qartë për të gjithë rivalët në vazhdim të Botërorit, raporton TCH.