Sot në Skenderaj, Organizata e Veteranëve të Luftës së UÇK-së mbajti një takim urgjent “për të shqyrtuar ngjarjet e fundit dhe përkeqësimin e klimës së sigurisë pas veprimit absurd që të angazhohen njësitë speciale për një zënkë të zakonshme e pa pasoja të rënda”.

“Të jemi të qartë. Strukturat e sigurisë së Republikës ekzistojnë për të mbrojtur qytetarët dhe rendin kushtetues, e jo të marrin pjesë në shtetrrethime e ngjallje të frikës. Me këtë rast u drejtohemi pjesëtarëve të Policisë të mos harrojnë se mandati i tyre buron nga Kushtetuta dhe ligjet, e jo nga urdhrat qeveritare në dobi të zbatimit të skenareve të porositura nga Albini Kurti dhe banda e tij”.

“Nëse uniforma e Kosovës kthehet në instrument për të vendosur tiraninë e regjimit, atëherë përpos urdhërdhënësve, përgjegjësia bëhet edhe personale”.

“Në mbrojtje të lirisë, demokracisë e rendit kushtetues, me çdo mjet do të pengojmë secilin individ apo organizim politik që tenton të vendos diktaturën. Diktatura mori fund në qershor të vitit 1999. Kushdo që tenton ta vëjë këtë realitet në provë, le të urdhërojë. Këtu jemi. Të gatshëm gjithmonë të sakrifikohemi në mbrojtje të lirisë dhe shtetit që ka në themele mundin e luftëtarëve e gjakun e Dëshmorëve të UÇK-së”, thuhet në reagimin e OVL-UÇK-së.