Ministri i Punës, Andin Hoti, ka njoftuar se nga 1 shtatori Inspektorati Qendror i Punës do të kalojë në inspektime plotësisht digjitale, me synim forcimin e mbikëqyrjes inspektuese dhe rritjen e efikasitetit në terren.

Sipas tij, sistemi i ri do të mundësojë dokumentim në kohë reale, transparencë më të madhe, llogaridhënie të shtuar dhe monitorim më efikas të inspektimeve.

Hoti bëri të ditur se njëkohësisht do të nisë edhe përdorimi i teknologjisë së dronëve si mjet mbështetës për inspektimin e kantiereve dhe vendeve të punës me rrezik të shtuar, në përputhje me legjislacionin në fuqi.

Ai theksoi gjithashtu se do të iniciohet forcimi i koordinimit ndërinstitucional, në mënyrë që institucionet përgjegjëse të shkëmbejnë informacione në kohë reale dhe mbikëqyrja të jetë më shumë parandaluese sesa vetëm reaguese.