Varroset rreshteri Muhamed Lika që u vra mbrëmë në Kaçanik

Është varrosur rreshteri Muhamed Lika, i cili u vra mbrëmë në hyrje të banesës së tij në Kaçanik.

Në varrimin e Likës morën pjesë shumë qytetarë e zyrtarë policorë, ku i njëjti u varros me nderime shtetërore.

Në lidhje me vrasjen e rreshterit Lika, kryeprokurori i Prokurorisë Themelore në Ferizaj, Burim Çerkini, ka bërë të ditur se të dyshuar janë dy persona.

“Të dyshuarit nuk kanë përdorur maska, por kapela. Ka qenë errësire dhe identifikimi bëhet më i vështirë. Nuk ka të bëjë me ndonjë pistë të grabitjes, nuk ekziston ndonjë pistë që të dyshuarit kanë pasur për qëllim grabitjen. Vërehet qartë që qëllimi i tyre ka qenë ekzekutimi i rreshterit”, tha Çerkini, njofton Klankosova.tv.

Ndërsa, prokurori i rastit, Ismet Rrahmani, tha se viktima ka marrë vetëm një goditje dhe se i njëjti nuk ka pasur të veshur antiplumb në momentin kritik.