Rektori i Universitetit të Prishtinës, prof. Arben Hajrullahu, në ceremoninë e ndarjes së titullit “Doctor Honoris Causa” për kongresistin amerikan Joseph J. DioGuardi dhe veprimtaren Shirley Cloyes DioGuardi, ka vlerësuar kontributin e tyre të jashtëzakonshëm për Kosovën dhe shqiptarët.

Në fjalën e tij, rektori Hajrullahu tha se Universiteti i Prishtinës sot nuk po nderon vetëm dy personalitete të shquara, por edhe një miqësi dhe një kapitull të rëndësishëm të historisë së përbashkët.

“Joseph J. DioGuardi dhe Shirley Cloyes DioGuardi i kanë dhënë Kosovës shumë më tepër se mbështetje politike: i kanë dhënë zë atëherë kur zëri i saj mezi dëgjohej, i kanë dhënë miqësi atëherë kur ajo kishte shumë nevojë për miq, dhe i kanë dhënë shpresë atëherë kur shpresa ishte ndër gjërat më të rralla”, tha Hajrullahu.

Ai theksoi gjithashtu rolin e Ligës Qytetare Shqiptaro-Amerikane në informimin dhe ndërgjegjësimin e opinionit dhe politikës amerikane për çështjen e Kosovës.

Sipas tij, një prej rezultateve më të rëndësishme të kësaj pune ishte misioni faktmbledhës i 29 gushtit 1990, kur shtatë senatorë amerikanë, të udhëhequr nga Robert J. Dole, vizituan Prishtinën.

“Ju ishit ndër të parët dhe ndër më këmbëngulësit që trokitët në dyert e politikës amerikane dhe i hapët ato dyer për Kosovën dhe për shqiptarët në përgjithësi”, u shpreh rektori.

Hajrullahu rikujtoi edhe sloganin e njohur të DioGuardive: “Pavarësi për Kosovën Tani – E Vetmja Rrugë Drejt Paqes në Ballkan.”
Në fund të fjalimit, rektori i Universitetit të Prishtinës u tha dy të nderuarve se dyert e universitetit do t’i kenë gjithmonë të hapura.
“Këtu, ashtu si kudo në Kosovë, nuk jeni mysafirë; jeni në shtëpinë tuaj”, përfundoi Hajrullahu.