Ulutash: Situata është e qetë, por e brishtë

Komandanti i KFOR-it, Ozgan Ulutash, i ka komentuar ngjarjet e vitit të kaluar në veri të vendit dhe dislokimin e forcave shtesë.

Ulutash tha se pas ngjarjeve të dhunshme në maj dhe shtator të vitit 2023, NATO ka dislokuar rreth 1 mijë trupa shtesë, ku sipas tij, këta hapa siguruan që KFOR-i të ketë forcat aftësitë dhe fleksibilitetin për të përmbushur mandatin e tij të OKB-së.

“Ky zbarkim shtesë ka dëshmuar se ne jemi në gjendje të përshtatemi me shpejtësi dhe në mënyrë efektive me çdo zhvillim të rëndësishëm të sigurisë”.

“Ai ka kontribuar gjithashtu për ta bërë praninë tonë në terren edhe më të dukshme dhe fleksibile, siç dëshmohet nga fakti se ne kemi trefishuar patrullimet tona, veçanërisht përgjatë Vijës Kufitare Administrative”, tha Ulutash në një konferencë për media, njofton Klankosova.tv.

Më tej, Ulutash tha se objektivi kryesor i KFOR-it është parandalimi i përshkallëzimit, por sipas tij, në rast të tensioneve më të mëdha, ata janë gati dhe të pajisur për të ndërmarrë të gjitha veprimet e nevojshme për të vazhduar përmbushjen e mandatit të tyre.

“Në përgjithësi, situata në terren është e qetë, por mbetet e brishtë. Prandaj, ne jemi duke ndjekur nga afër çdo zhvillim të rëndësishëm të sigurisë, duke përfshirë edhe veriun e Kosovës, përmes një qëndrimi të dukshëm dhe fleksibil, me patrulla të rregullta dhe angazhime me komunitetet lokale”, tha Ulutash.