Presidenti amerikan, Donald Trump, tha më 26 shtator se e refuzon planin shtatëditor të Iranit për rihapjen e Ngushticës së rëndësishme të Hormuzit, duke e cilësuar si të papranueshëm.

“Po e refuzoj marrëveshjen e tyre. Ata duan të bëjnë një marrëveshje për ta hapur menjëherë ngushticën sepse po humbin keq”, u tha Trump gazetarëve jashtë Shtëpisë së Bardhë. “Edhe mua më pëlqen të bëj marrëveshje, por kjo marrëveshje nuk do të ishte e pranueshme”.

Një ditë më parë ministri i Jashtëm iranian, Abbas Araqchi, tha se Teherani i kishte paraqitur Uashingtonit një plan “konkret” për rihapjen e ngushticës, i cili kërkon hapa të ngjashëm me ata të përcaktuar në një memorandum që të dyja vendet nënshkruan në Islamabad në fillim të këtij viti.

Mbyllja de facto e Ngushticës së Hormuzit ka qenë një pengesë e madhe për arritjen e një marrëveshje për përfundimin e luftës mes Shteteve të Bashkuara dhe Iranit.

Në përgjigje të sulmeve amerikane dhe izraelite, Teherani kufizoi qasjen në ngushticë në fillim të luftës që nisi në fund të shkurtit, duke shkaktuar pengesa në tregjet globale të naftës dhe duke çuar në rritjen e ndjeshme të çmimeve. Uashingtoni, në anën tjetër, vendosi një bllokadë detare ndaj Iranit, duke devijuar anijet dhe duke i penguar ato që të arrinin në portet e vendit.

Trump tha se Shtetet e Bashkuara kanë “kontroll të plotë” mbi Ngushticën e Hormuzit. Ai tha se “sasi të mëdha nafte” po transportohesn përmes kësaj rruge ujore, ndërsa gjatë 24 orëve të fundit ngushticën e kishin kaluar 29 anije.

“Ata ia kanë dalë të mashtrojnë veten”, theksoi presidenti amerikan, raporton rel.

Trump shtoi se Uashingtoni i ka ndërprerë Teheranit një nga burimet kryesore të të ardhurave përmes bllokadës detare.

“Tani nuk kanë para, sepse donin ta mbyllnin ngushticën dhe ne ua mbyllëm atyre”, tha ai.