Presidenti amerikan, Donald Trump, ka thënë të hënën se Shtetet e Bashkuara mund të bëhen “engjëlli mbrojtës” i Ngushticës së Hormuzit, pas një vale të re sulmesh ajrore, të nxitura nga aktivitetet në këtë rrugë jetike ujore, që tronditën rajonin e Gjirit.

Në një intervistë telefonike për Fox News të hënën, Trump tha se nëse Shtetet e Bashkuara e marrin kontrollin e ngushticës, ato duhet të kompensohen për këtë detyrë.

Nëpër këtë ngushticë kalonin rreth një e pesta e transportit botëror të naftës dhe gazit në kohë paqeje, dhe ajo tani është bërë një nga fushëbetejat kryesore të konfliktit, raporton Rel.

“Ne do ta mbajmë ngushticën dhe me shumë gjasa do ta administrojmë atë. Do të bëhemi mbrojtësi i ngushticës. Ndoshta do ta quajmë engjëlli mbrojtës i ngushticës. Dhe, duhet të na kompensojnë për këtë”, tha ai, pa dhënë hollësi të tjera.

Trupat e Gardës Revolucionare Islamike të Iranit (IRGC) thanë të hënën se e vetmja mënyrë për ta rikthyer lundrimin nëpër ngushticë është ndërprerja e ndërhyrjes ushtarake amerikane në këtë rrugë ujore.

Ndërkohë, Trumpi e bëri këtë kërcënim pak pasi Shtetet e Bashkuara goditën shënjestra në jug të Iranit si përgjigje ndaj sulmeve të Teheranit kundër anijeve në Ngushticën e Hormuzit, gjë që nxiti sulme iraniane ndaj fqinjëve të tij në Gjirin Persik.