Trump kërcënon Kinën: Tarifë 200% për mallrat nëse magnetet e rralla nuk eksportohen në SHBA
Presidenti Donald Trump kërcënoi të vendosë një tarifë prej 200% për mallrat kineze nëse vendi nuk rrit eksportet e magneteve të metaleve të rralla në Shtetet e Bashkuara.
“Ata duhet të na japin magnete, nëse nuk na japin magnete, atëherë ne duhet t’u vendosim një tarifë prej 200% ose diçka të tillë”, u tha Trump gazetarëve të hënën, ndërsa priste Presidentin e Koresë së Jugut, Lee Jae Myung, në Zyrën Ovale. “Por ne nuk do të kemi problem me këtë”, shtoi Trump, raporton Ballkanweb.
Trump tha se një tarifë prej 200% do të thoshte në mënyrë efektive se SHBA-të “nuk do të bënin asnjë biznes me Kinën”. Kjo është në thelb ajo që ndodhi kur Trump vendosi një tarifë prej 145% për mallrat kineze, të cilën ai e ka ulur që atëherë në 30%, në fillim të këtij viti. Kina u përgjigj me një tarifë prej 125% për mallrat amerikane, të cilën e ka ulur që atëherë në 10%. Ndërsa tarifat më të larta ishin në fuqi, tregtia midis SHBA-së dhe Kinës pothuajse u ndal.
Ndërsa SHBA-të dhe Kina ranë dakord kohët e fundit për një armëpushim 90-ditor për të mbajtur në fuqi tarifat më të ulëta, eksportet kineze të magneteve të metaleve të rralla kanë vazhduar të jenë një burim mosmarrëveshjesh, me administratën Trump që pretendon se Kina po pengon qëllimisht mbërritjen e këtyre materialeve thelbësore në SHBA.