Sveçla takon Lammyn, flasin për luftën ndaj ilegalitetit që cenon stabilitetin e vendit

Ministri në detyrë i Punëve të Brendshme, Xhelal Sveçla, ka takuar Sekretarin e Jashtëm të Britanisë së Madhe, David Lammy.

Sveçla tha se me Lammyn diskutuan për luftën ndaj çdo ilegaliteti që cenon sigurinë dhe stabilitetin e vendit.

“Sekretarin z. Lammy e njoftova edhe mbi sfidat e vazhdueshme të sigurisë të shkaktuara nga Serbia përmes grupeve të saj kriminale e terroriste që kanë për qëllim të destabilizojnë vendin tonë”.

“Bashkë me Sekretarin z. Lammy dhe delegacionin e tij vizituam edhe Qendrën Kombëtare për Menaxhim Kufitar dhe pamë nga afër demonstrimin e pajisjeve teknologjike përmes së cilave policia jonë kufitare parandalon veprat ilegale ndërkufitare”, tha Sveçla.

Më tej, ai u shpreh mirënjohës ndaj Mbretërisë së Bashkuar, për siç tha, mbështetjen e parezervë për të gjitha institucionet e vendit, e veçanërisht për atë në fushën e sigurisë.