Stoltenberg: NATO do të punojë ngushtë me Ukrainën pa qenë palë në luftë

NATO do të punojë më ngushtë me forcat e armatosura të Ukrainës pa qenë palë në luftën e vazhdueshme, tha të premten shefi i aleancës.

“Ne do të rrisim mbështetjen tonë për Ukrainën për një kohë të gjatë, do të përforcojmë mbrojtjen tonë kolektive dhe do të thellojmë partneritetet tona globale”, tha sekretari i përgjithshëm Jens Stoltenberg në një konferencë shtypi në Uashington, duke shtuar se vendime të rëndësishme do të merren në samitin tre-ditor të aleancës në kryeqytetin amerikan javën e ardhshme.

Duke e quajtur mbështetjen për Ukrainën si detyrën më urgjente që aleanca do të trajtojë gjatë samitit, ai tha: “Unë pres që krerët e shteteve dhe qeverive të bien dakord për një paketë thelbësore për Ukrainën”.Më konkretisht, aleanca do të marrë përsipër koordinimin dhe ofrimin e shumicës së ndihmës ndërkombëtare të sigurisë, vuri në dukje ai, duke shtuar: “Kjo nuk do ta bëjë NATO-n palë në konflikt. Por kjo do të forcojë vetëmbrojtjen e Ukrainës”.

Përveç kësaj, anëtarët e NATO-s do të vazhdojnë t’i ofrojnë Ukrainës armët që i nevojiten, duke përfshirë nevojat e menjëhershme për sistemet e mbrojtjes ajrore dhe municionet, dhe të thellojnë ndërveprimin dhe punën për të ndërtuar një industri të mbrojtjes ukrainase, sipas Stoltenberg.
“E gjithë puna që po bëjmë së bashku është ta bëjmë Ukrainën më të fortë, më të ndërveprueshme dhe më të përgatitur se kurrë për t’u bashkuar me aleancën tonë”, tha aiStoltenberg gjithashtu vuri në dukje se që nga viti 2014, kur filluan sulmet ruse në Ukrainën lindore dhe Krimenë – përpara luftës aktuale, e cila filloi në vitin 2022 – aftësitë dhe gatishmëria e aleancës janë përmirësuar ndjeshëm.

Duke pohuar se Irani dhe Koreja e Veriut ndihmojnë përpjekjet e luftës ruse duke siguruar dronë dhe municione dhe se Kina po e mbështet Rusinë ekonomikisht, ai tha: “Sa më afër që akterët autoritarë të rreshtohen, aq më e rëndësishme është që ne të punojmë ngushtë me miqtë tanë në Indo-Paqësor”.

Stoltenberg do të largohet nga posti i shefit të NATO-s këtë vjeshtë, por pasardhësi i tij, ish-kryeministri holandez Mark Rutte, thuhet se ka të njëjtin qëndrim me Stoltenberg lidhur me luftën Rusi-Ukrainë. /AA