Presidenti i Federatës së Futbollit të Kosovës (FFK), Agim Ademi, ka njoftuar nisjen e projektit “Ndriçojmë Futbollin”, i cili synon modernizimin e sistemeve të ndriçimit në stadiumet dhe fushat e futbollit në Kosovë.

Ademi ka bërë të ditur se për herë të parë në kuadër të këtij projekti, ndeshja në stadiumin “18 Qershori” në Klinë po zhvillohet nën dritën e reflektorëve.

“Një pamje kjo që na gëzon, por që edhe simbolizon drejtimin në të cilin duam të ecë futbolli ynë”, ka shkruar Ademi.

Sipas tij, në etapën e parë të projektit, sisteme moderne të ndriçimit do të vendosen edhe në stadiumin e Gjilanit dhe në stadiumin “Bajram Aliu” në Skenderaj.

Ademi ka theksuar se ky është vetëm fillimi i një procesi që synon krijimin e kushteve më të mira për klubet, futbollistët dhe tifozët, duke bërë që ndeshjet nën reflektorë të bëhen pjesë e zakonshme e futbollit në Kosovë.

“Po i ndriçojmë stadiumet tona, për ta bërë edhe më të ndritshme të ardhmen e futbollit të Kosovës!”, ka përfunduar ai.