Sportistja më e mirë e vitit 2024 në Mitrovicë shpallet Blerina Gashi nga klubi i xhudos “Trepça”

Drejtoria për Kulturë, Rini dhe Sport, ka mbajtur ceremoninë e shpalljes së klubeve sportive dhe sportistit më të mirë për vitin 2024.

Në këtë ceremoni ishin të pranishëm nënkryetari i komunës, Arian Tahiri, kryesuesja e kuvendit, Vesa Broja, drejtorë të drejtorive komunale, përfaqësues të FSK-së, përfaqësues të Policisë së Kosovës, përfaqësues të KFOR-it, Veteranë të UÇK-së, sportdashës, punëtorë të sportit, si dhe përfaqësuesit e klubeve sportive e sportistët që u shpallën më të mirët për vitin 2024.

Në fjalën e tij nënkryetari i komunës, Arian Tahiri, pasi i përshëndeti të pranishmit, tha se ndihet i privilegjuar që ndodhet në mesin e sportistëve, për të cilët shprehu mirënjohjen më të lartë për kontributin e tyre në ngritjen e epitetit të Mitrovicës, si qytet i kulturës, artit dhe sportit.

Nënkryetari Tahiri ka falënderuar edhe tifozerinë më të madhe kosovare ”Torcida”, të cilët me mbështetjen e tyre i japin frymë jetës sportive në qytetin e Mitrovicës.

Juria profesionale, sportist të vitit 2024 shpalli xhudisten e klubit “Trepça”, Blerina Gashi si fituese e medalieve të arta në gara ndërkombëtare, ndërsa çmimi “Lah Nimani”, i është ndarë ish futbollistit dhe trajnerit të mirënjohur, Rafet Prekazi, kurse klubi sportiv i vitit 2024 u shpall klubi i xhudos “Trepça”, ndërsa titulli si trajner i vitit 2024 i takoj Blerand Begut nga klubi i xhudos “Trepça”.

Në këtë ceremoni janë ndarë mirënjohje të veçanta edhe për shumë personalitete që kanë kontribuar ndër vite për zhvillimin e sportit në Mitrovicë.