Shuma rekord, fitimet për ekipet dhe pilotët në F1
Të ardhurat e Formula 1 vazhdojnë të rriten nën menaxhimin e “Liberty Media”, kompanisë që kontrollon kompeticionin më prestigjioz të automobilizmit.
Ata kanë shkuar nga 2,573 miliardë dollarë në vitin 2022 në 3,222 miliardë dollarë në 2023-shin, për të arritur në 3,411 miliardë dollarë në vitin 2024. Rritja e shifrave është kontribuar nga numri i Çmimeve të Mëdha, i cili ka shkuar në 24, por gjithashtu edhe nga shtimi i sponsorëve.
Nga këto, 2,757 miliardë vijnë nga aktiviteti kryesor, pra, nga tarifat e regjistrimit, të drejtat televizive dhe sponsorët. Pjesa e mbetur prej 654 milionë vjen nga “Paddock Club”, licencat, garat mbështetëse etj. Pjesa e të ardhurave për ekipet ishte 1,266 miliardë dollarë, e ndarë më pas në bazë të pozicionit në renditjen e konstruktorëve dhe shpërblimeve të tjera si ato historike dhe statuset speciale.
Në radhët e pilotëve, është Maks Vershtapen ai që ka pagën më të lartë, teksa arkëton 50 milionë euro në vit, 10 më shumë se Luis Hamilton që renditet në vendin e dytë në këtë klasifikim. Më tej vjen Sharl Lëklerk, i treti me 30 milionë euro në sezon, duke bërë që Ferrari të jetë skuadra me pagat më të larta në Formula 1.
SA FITOJNË EKIPET E F1
Nga 1.266 miliardë dollarë të shpërndara për skuadrat për sezonin 2024, Ferrari fitoi pjesën më të madhe me 242 milionë dollarë në paratë e çmimeve të kampionatit, plus bonuse historike dhe status special. Më pas vjen MekLaren, e cila ka përfituar mbi të gjitha nga titulli kampion për konstruktorë për të arritur shifrën 168 milionë. Red Bulli dhe Mercedesi, nga ana tjetër, kanë rënë në krahasim me vitin 2023, me fitime përkatësisht 152 dhe 151 milionë dollarë. Ndikim për këto ekipe ka pasur edhe pozita në renditjen e konstruktorëve, në këtë rast e përkeqësuar. Më tej, vijnë Alpine me 110 milionë, Aston Martin me 106, Haas dhe Uilliams me 90, Racing Bulls me 84 dhe Sauber, i fundit, me 74 milionë dollarë.
PAGAT E PILOTËVE
Më i paguar në Formula 1 në vitin 2025 është katër herë kampioni i botës, Maks Vershtapen. Paga e holandezit të Red Bullit është 50 milionë euro në vit. Vendi i dytë dhe i tretë për pilotët e Ferrarit, me Luis Hamilton me 40 milionë dhe Sharl Lëklerk me 30 milionë, shifra që e bëjnë skuadrën nga Maranelo me pagat më të larta për dyshen e pilotëve në F1. Vendi i katërt për Lando Norris me 20 milionë, përpara Fernando Alonsos që paguhet 18 milionë euro në vit. Më tej vijnë Xhorxh Rasëll me 14 dhe Oskar Piastri me 13 milionë. Me 9 milionë euro në vit gjejmë Pierr Gaslin nga ekipi Alpine, përpara Karlos Sainzit me 7 milionë dhe Niko Hulkenbergut me 6.5 milionë. Pasojnë Esteban Okon me 6 milionë, Aleks Albon me 5, Lans Stroll me 3 dhe Iuki Tsunoda me 2 milionë. Renditja mbyllet nga gjashtë fillestarët e këtij sezoni: 1 milion në vit paga për Kimi Antonelin, Oliver Bearman, Liam Lauson dhe Gabriel Bortoleto, ndërsa më pak të paguarit janë Isak Hadjar dhe Xhek Dohan me nga 500 mijë euro secili.
