U.d. presidentja e Kosovës, Albulena Haxhiu, ka uruar Shtetet e Bashkuara të Amerikës me rastin e 250-vjetorit të Pavarësisë, duke e shënuar këtë ditë me një vizitë në Kampin Bondsteel.

Përmes një postimi në ‘Facebook’, Haxhiu bëri të ditur se, së bashku me pjesëtarët e Grupit për Mbështetje në Ballkan, ndau festën me ushtarët amerikanë në këtë bazë ushtarake.

Ajo theksoi se 4 Korriku përfaqëson vullnetin e popullit si burim të lirisë dhe demokracisë, duke shtuar se për Kosovën kjo datë është e lidhur ngushtë me miqësinë dhe mbështetjen e vazhdueshme të Shteteve të Bashkuara.

“Ushtarëve dhe qytetarëve amerikanë ua përcolla urimet më të përzemërta për 250-vjetorin e Pavarësisë, bashkë me mirënjohjen për aleancën që na ka bashkuar në të kaluarën dhe vazhdon të na prijë drejt së ardhmes”, ka shkruar Haxhiu.

Në fund të mesazhit të saj, u.d. presidentja uroi: “Gëzuar 4 Korrikun!”.