Kryetari i Komunës së Skenderajt, Sami Lushtaku, ka vizituar fshatin Kalludër në Zubin Potok, vendin ku dyshohet se gjenden mbetjet mortore të disa personave të vrarë gjatë luftës në Kosovë, duke kërkuar zbardhjen e fatit të tyre dhe drejtësi për familjet e tyre.
Lushtaku, përmes një postimi në “Facebook”, ka kujtuar se 19 maji i vitit 1999 ishte dita e fundit kur këta persona u panë të gjallë, ndërsa familjet e tyre vazhdojnë të jetojnë me dhimbjen e pritjes. “Që nga ajo ditë, familjet e tyre dhe shoqëria jonë jetojnë me dhembjen e pritjes, ndërsa Kosova mban ende një nga plagët e mëdha të luftës”, ka shkruar Lushtaku.
Ai ka përmendur emrat e Idriz Rrecit, doktorit Fatmir Fazlija, profesorit Demir Ahmeti, Shaqir, Samir, Xhemail, Salih, Naser, Zymer, Tahir, Selim, Bekim dhe Xhevdet Mëziut, Sahit Beranit, Ali Halitit, Adem Ademit, Adem Beqirit, Hasan Dërvarit, Shaip, Mahir, Faton, Shkëlzen dhe Nazim Ujkanit.
Sipas tij, ky grup përfaqësonte “zërin e dijes dhe të atdhedashurisë”, ndërsa ka kërkuar zbardhjen e plotë të së vërtetës dhe përgjegjësi për autorët e këtij krimi.
“Me shpresën që ky vend do t’u japë fund viteve të gjata të pritjes dhe se më në fund ata do të kthehen pranë familjeve të tyre, për t’u prehur me dinjitet në tokën e vendlindjes për të cilën dhanë aq shumë”, ka shkruar kryetari i Skenderajt.
Postimi i tij:
19 Prilli i vitit 1999 ishte dita e fundit kur u panë të gjallë. Që nga ajo ditë, familjet e tyre dhe shoqëria jonë jetojnë me dhembjen e pritjes, ndërsa Kosova mban ende një nga plagët e mëdha të luftës.
Sot vizituam vendin ku dyshohet se gjenden mbetjet mortore të patriotit Idriz Rreci, doktorit Fatmir Fazlija, profesorit Demir Ahmeti, Shaqir, Samir, Xhemail, Salih, Naser, Zymer, Tahir, Selim, Bekim dhe Xhevdet Mëziut, Sahit Beranit, Ali Halitit, Adem Ademit, Adem Beqirit, Hasan Dërvarit, Shaip, Mahir, Faton, Shkëlzen dhe Nazim Ujkanit.
Ky grup ishte zëri i dijes dhe i atdhedashurisë. Sot kërkojmë të vërtetën dhe drejtësinë por dhe përgjegjësi për autorët e këtij krimi. Me shpresën që ky vend do t’u japë fund viteve të gjata të pritjes dhe se më në fund ata do të kthehen pranë familjeve të tyre, për t’u prehur me dinjitet në tokën e vendlindjes për të cilën dhanë aq shumë.
Lavdi e përjetshme!
SL