Real Madridi është i gatshëm të dëgjojë oferta për yllin brazilian Vinicius Junior gjatë afatit kalimtar të verës, në një lëvizje që mund të shkaktojë një nga zhvillimet më të bujshme të merkatos.

Sipas raportimeve të gazetës franceze L’Equipe, drejtuesit e klubit madrilen po shqyrtojnë mundësinë e shitjes së sulmuesit brazilian, me qëllimin që të ardhurat nga një transferim i mundshëm të përdoren për të financuar një përforcim të madh në repartin ofensiv.

Objektivi kryesor i “Los Blancos” thuhet se është sulmuesi francez i Bayern Munichut, Michael Olise, i cili është futur në listën e dëshirave të klubit spanjoll për sezonin e ardhshëm.

Largimi i Vinicius Jr do t’i krijonte Real Madridit hapësirën e nevojshme financiare për të tentuar transferimin e Olises dhe për të ndërtuar një sulm edhe më të fuqishëm.

Vinícius, i cili prej vitesh është një nga lojtarët më të rëndësishëm të skuadrës madrilene, ka qenë një nga figurat kryesore të suksesit të Real Madridit në vitet e fundit. Megjithatë, situata e tij në klub po vlerësohet nga drejtuesit, sidomos në kuadër të planeve të reja për të ardhmen.

Megjithatë, deri në këtë moment nuk ka pasur asnjë konfirmim zyrtar nga Real Madridi për një vendim të tillë, ndërsa mbetet për t’u parë nëse klubi spanjoll do të ndërmarrë një nga lëvizjet më të mëdha të afatit kalimtar të kësaj vere.