Reagim i KMDLNj-së: Mekanizmi mbikëqyrës për Gjykatën Speciale, vetëm për vota
Dhomat e Specializuara apo Gjykata Speciale është një stërkeqe juridike që me asgjë nuk i përgjigjet themeluesit – Kuvendit të Kosovës ndonëse edhe institucionet e vendit deklarojnë se është pjesë e sistemit të Drejtësisë së sikur që edhe vet Gjykata Speciale e thotë të njëjtën gjë. Në anën tjetër kjo Gjykatë me asgjë nuk identifikohet me sistemin e Drejtësisë së Kosovës, as me logo, as me ndonjë shenjë tjetër identifikuese. Kurrë dhe asnjëherë nuk i ka raportuar apo informuar Kuvendin e Kosovës sepse krejt sovranitetin vendimmarrës e raporton në Bruksel dhe Serbi. Ekskluzivitetin për monitorim brenda burgut e ka Komiteti Ndërkombëtar i Kryqit të Kuq i Gjenevës dhe Avokati i Popullit i Holandës. Brenda këtij burgu është edhe një Ombudsman që nuk i trajton ankesat e të burgosurve, shtetas të Kosovës dhe të gjithë shqiptarë por trajton vetëm të drejtat e njeriut të të punësuarve në këtë monstrum juridik. Monitorimi i procesit gjyqësor bëhet vetëm pjesërisht shkaku se shumë seanca janë të mbyllura për publikun. Gjykata Speciale në Hagë në mënyrë brutale e dhunon parimin e publicitetit sikur që është jashtëzakonisht jotransparente dhe i mungon, si nga forma ashtu edhe nga përmbajtja llogaridhënia. KMDLNj vazhdimisht ka këmbëngulur që Kuvendi i Kosovës, si “themelues”, të mbajë një apo më shumë seanca ku do të kërkohej transparencë dhe llogaridhënie për trajtimin e pengjeve të Hagës e që në asnjë mënyrë nuk do të merrej si ndërhyrje në punën e kësaj gjykate. Deputetët e Kuvendit të Kosovës të ndarë në baza partiake dhe politike nuk e kanë bërë as përpjekjen më të vogël të luajnë rolin e të zgjedhurit të popullit dhe përmbushjen e mandatit detyrues për përfaqësim dhe mbrojtje të drejtave të njeriut përkatësisht të drejtave të njeriut të personave të privuar nga liria. KNKK nga Gjeneva nuk ka kohë të takojë të burgosurit dhe të dëgjojë shqetësimet e arsyeshme kurse Avokati i Popullit i Holandës nuk merret fare me këtë çështje dhe nuk i njehë autoritetet kosovare. Pengjet në Hagë janë vizituar nga deputetë të Kuvendit, nga Komisioni për të drejtat e njeriut i Kuvendit të, nga ministra, z/kryeministra dhe nga Kryetari i Kuvendit. Presidentja dhe KM i Kosovës nuk e kanë treguar as interesimin më të vogël për t’i vizitua që, sipas KMDLNj-së është qasje diskriminuese. Edhe vizitat janë bërë selektive, për turizëm, për selfie dhe për përfitime politike dhe materiale. Sidomos materiale shkaku se përveç rrogës së majme, kanë marrë edhe mëditje për këto vizita.
Më parë kryetari i Kuvendit kishte kërkuar një Mekanizëm monitorues dhe kjo ishte e tëra që e bëri. Ishte mashtrim ordiner. Një muaj para zgjedhjeve parlamentare dhe para përfundimit të mandatit, ministrja e Drejtësisë kërkoi të formohet një Mekanizëm vendor a ndërkombëtar për monitorim ndonëse nuk ka lënë gurë pa lëvizur t’ua bëjë jetën sa më të rëndë dhe t’ua pakësojë mundësitë për një mbrojtje efektive.
KMDLNj deklaron se këto janë deklarata mashtruese, për përdorim të brendshëm, për përfitime politike dhe blerje të votave. Të gjitha këto shkelje ishin identifikuar nga KMDLNj por se nuk janë përfillur nga “kërkuesit” e formimit të këtij mekanizmi. Reagimet e KMDLNj-së kanë qenë të shumta. KMDLNj ia përkujton opinionit se asnjë vizitë nga Kosova pavarësisht cilit institucion i përkasin nuk llogaritet si vizitë zyrtare por si vizitë private apo familjare që tregon qartë shpërfilljen që ua bënë Gjykata edhe përfaqësuesve më të lartë institucionalë.
KMDLNj shpreson se përbërja e ardhshme e Kuvendit të Kosovës do të jetë më e përgjegjshme, profesionalisht dhe institucionalisht duke amandamentuar Ligjin për Gjykatën Speciale duke kërkuar transparencë, llogaridhënie dhe afatizim të punës.
Ose, që do të konsiderohej e përgjegjshme dhe minimalisht e ndershme të deklarojë botërisht se kjo Gjykatë nuk është, me asgjë e Kosovës.