Deputeti i Aleancës, Burim Ramadani, ka reaguar për situatën politike dhe për shkeljet e kushtetutshmërisë lidhur me konstituimin e Kuvendit dhe formimin e institucioneve të reja.
Ramadani thekson se Aleanca nuk e konteston fitoren e VV-së në zgjedhjet e 7 qershorit, e as të drejtën e saj për të zgjedhur Kryetarin e Kuvendit dhe Qeverinë, por kërkon që ky mandat të zbatohet në praktikë.
Sipas tij, Aleanca ka ofruar mbështetje për zgjedhjen e Presidentit përmes një pakete me gjashtë propozime, pa kërkuar asnjë pozitë apo përfitim partiak.
“Ne nuk kontestojmë fitoren e VV-së. Duam që në zgjedhjet e ardhshme të fitojmë ne, por momentalisht fitoren e ka pasur VV”, ka shkruar Ramadani.
Postimi i tij:
Ne po alarmojmë për shkeljet e kushtetutshmërisë!
• Mbajeni pushtetin, por harrojeni që mund ta prishni shtetin!
1. Ne nuk kontestojmë fitoren e VV-së. Duam që në zgjedhjet e ardhshme të fitojmë ne, por momentalisht fitoren e ka pasur VV.
2. Ne nuk kontestojmë të drejtën e tyre për të zgjedhur Kryetarin e Kuvendit dhe Qeverinë.
Këtë të drejtë e kanë marrë më 7 qershor dhe DUHET ta zbatojnë në praktikë.
3. Ne kemi ofruar mbështetjen tonë të plotë për zgjedhjen e Presidentit pa marrë hiq asgjë, bash asgjë për Aleancën. Asnjë pozitë, asnjë përfitim partiak. Kemi ofruar pakon me 6 propozime për vendime strategjike e jetike për popullin e Kosovës për të dhënë 7 votat tona në kuorumin për president.
Të gjitha këto po i konteston vet VV-ja.
Së pari, po REFUZOJNË të propozojnë kandidatin për Kryetar Kuvendi. Rrjedhimisht, nuk po e zbatojnë vullnetin e popullit që VV-ja të udhëheq Kuvendin e Kosovës.
Së dyti, duke mos konstituuar Kuvendin, nuk po e bëjnë Qeverinë e re, për të cilën populli e ka votuar më 7 qershor. Pra, po e lënë Kosovën pa Parlament e pa Qeveri.
Së treti, asnjë fjalë të vetme për ofertën tonë 6 pikëshe që nga 26 qershori dhe, rrjedhimisht, ata s’po duan 7 votat tona për ta bërë kuorumin për President.
Në krejt këtë situatë amullie që po krijojnë, VV-ja ka tejkaluar edhe afatet kushtetuese për konstituimin e Kuvendit.
Pra, po e çon Kosovën në pakushtetutshmëri.
Prandaj, ne alarmojmë për shkeljen e Kushtetutshmërisë.
Ne jemi aktiv dhe do të jemi vazhdimisht në promovim e mbrojtje të kushtetutshmërisë.
Mbajeni pushtetin, por harrojeni që mund ta prishni shtetin!
#Aleanca #Demokracia