Rama takohet me Papa Leon XIV, flasin për çështjet e Ballkanit dhe integrimin në BE
Kryeministri i Shqipërisë, Edi Rama, të enjte ka zhvilluar një takim me Papa Leon XIV. Gjatë këtij takimi Rama ka qenë i shoqëruar nga bashkëshortja e tij, Linda Rama dhe djali i tij.
Sipas një deklarate me shkrim nga Vatikani, Papa priti kryeministrin Rama mëngjesin e së enjtes në Vatikan.
Më pas u zhvillua një takim në Sekretarin e Shtetit të Selisë së Shenjtë me kardinalin Pietro Parolin dhe Sekretarin për Marrëdhëniet me Shtetet dhe Organizatat Ndërkombëtare (Ministri i Jashtëm), Kryepeshkopin Paul Richard Gallagher.
Në deklaratën e Vatikanit u nda informacioni se “Gjatë diskutimeve të përzemërta, u vu theksi në marrëdhëniet e mira dypalëshe midis dy vendeve, si dhe u trajtuan çështje me interes të përbashkët në lidhje me marrëdhëniet midis kishës dhe shoqërisë civile në vend”. “Takimi u përqendrua gjithashtu në çështjet kryesore rajonale, duke përfshirë situatën në vendet e Ballkanit Perëndimor dhe rrugën e Shqipërisë drejt integrimit të plotë në Bashkimin Evropian”, thuhet ndër të tjera deklaratë.
Rama po ashtu ka vizituar edhe bazilikën e famshme, ku gjendet shëmbëlltyra e Zojës së Këshillit të Mirë, mbi një copë të shkëputur nga muri i Kishës së Shkodrës në vitin e largët 1467.
“Që nga ajo kohë asnjë kryetar shteti ose qeverie shqiptare nuk e kishte shkelur pragun e bazilikës, ku krah Zojës së Shqipërisë qëndron përherë edhe flamuri ynë kombëtar, e ku kanë kryer vizita e rite thuajse të gjithë Papët e Romës. Gjëja e parë që bëri edhe Papa Leoni XIV sapo u zgjodh, ishte të vinte e të lutej në Genazzano te Zoja e Këshillit të Mirë, e cila thirret edhe Regina di Albania – Mbretëresha e Shqipërisë”, ka theksuar Rama.
Kryeministri Rama ka bërë homazhe edhe te varri i Papa Françeskut, të cilin e ka quajtur mik të paharruar të Shqipërisë dhe të familjes së tij. “Nuk harronte kurrë të lutej për popullin tonë e të na dërgonte mesazhet e tij të miqësisë, ishte një çast i veçantë i vizitës në Selinë e Shenjtë”, ka deklaruar Rama.