Kryetari i Prishtinës, Përparim Rama, ka kritikuar Qeverinë e Kosovës për, siç ka thënë, bllokimin e komunave dhe ndëshkimin e qytetarëve.

Përmes një postimi në rrjetet sociale, Rama ka thënë se sot, më 1 shtator, nxënësit në Kosovë po e fillojnë vitin e ri shkollor pa ditarë, duke e krahasuar situatën me vitet ’90, kur, sipas tij, pavarësisht rrethanave të okupimit, institucionet arsimore u mbajtën gjallë.

“Sot, pas gjithë sakrificës për ta ndërtuar këtë shtet, problemi ynë nuk është se nuk kemi institucione. Problemi është se Albin Kurti po i përdor institucionet për të bllokuar dhe ndëshkuar qytetarët”, ka shkruar Rama.

Ai ka akuzuar Qeverinë se po bllokon buxhetet, investimet dhe të hyrat vetanake të komunave, veçanërisht në komunat ku, sipas tij, Lëvizja Vetëvendosje nuk ka fituar.

Rama ka thënë se pasojat e këtyre veprimeve nuk i bartin kryetarët e komunave, por qytetarët.

“Duhet t’i mbrojmë komunat nga Qeveria jonë! Çfarë paradoksi! Çfarë marre!”, ka deklaruar ai.

Kryetari i Prishtinës ka theksuar se protesta, sipas tij, nuk bëhet për interesa partiake, por për mbrojtjen e qytetarëve dhe funksionimin e institucioneve.

“Jemi këtu sepse shteti duhet t’i shërbejë qytetarit, jo ta ndëshkojë atë”, ka shkruar Rama.

Në fund të reagimit, ai ka bërë thirrje për ndalimin e, siç i ka quajtur, “bllokadave” dhe “ndëshkimit të qytetarëve”, duke kërkuar zhvillim, qetësi dhe bashkim.

“Boll me përçarje e bllokada! Jemi bashkë! Jemi një! Kundër diktaturës dhe shtetshkatërrimit!”, ka përfunduar Rama.