Kryetari i Prishtinës, Përparim Rama, ka akuzuar qeverinë për bllokim të qëllimshëm të një projekti urban, që sipas tij do të lidhte mbi 30 mijë banorë me qendrën e qytetit.

Rama ka deklaruar se bëhet fjalë për një platformë që, përveç lidhjes së dy pjesëve të qytetit, do të shërbente edhe për rritjen e sigurisë dhe lehtësimin e qarkullimit për qytetarët.

Sipas tij, Komuna e Prishtinës tashmë e ka ndarë buxhetin, e ka realizuar projektin dhe kanë nisur punimet, por ato po ndalohen nga institucionet qendrore.

Postimi i tij në ‘Facebook’:

Ishulli urban që lidh 30,000 banorë me qendrën po BLLOKOHET. Një platformë që jo vetëm lidh dy pjesë të qytetit, por shërben edhe për siguri, po bllokohet prap qëllimisht.

Ne si Kryeqytet e kemi nda BUXHETIN, e kemi realizu PROJEKTIN dhe kanë fillu PUNIMET, ndërsa këta dalin dhe i ndalin punimet.

I ndalojnë punimet e Komunës, ndërsa biznesit privat i jepet leja!!!! Ky seleksionim kallxon sa hipokritë janë.

I bllokojnë 500,000 banorë për interesa politike. Këta bëjnë politikë me nevojat bazike të qytetarëve. Po, Prishtina nuk ka me mbet peng i bllokadave të kësaj qeverie. Nuk lejoj që qytetarët e Prishtinës me u blloku prej njerëzve të paaftë dhe dashakqij! Prandaj ftoj prokurorinë që menjëherë me u marrë me këtë çështje.