Kryetari i Prishtinës, Përparim Rama, ka njoftuar se Kuvendi Komunal ka votuar buxhetin e Kryeqytetit për vitin 2027, në vlerë prej mbi 161 milionë eurosh.

Rama e ka cilësuar votimin si një mundësi për Prishtinën që të planifikojë dhe të vazhdojë punën në projekte dhe shërbime për qytetarët.

“Urime, Prishtinë! Buxheti për vitin 2027 u votua. Mbi 161 milionë euro për qytetarët e Kryeqytetit: për shkollat, shërbimet publike dhe investimet që e çojnë Prishtinën përpara”, ka shkruar Rama.

Ai ka falënderuar asamblistët që votuan pro buxhetit, duke thënë se me votën e tyre treguan përgjegjësi ndaj qytetarëve.

“Ju falënderoj asamblistët që votuan pro. Sot treguan përgjegjësi ndaj qytetarëve dhe i dhanë Kryeqytetit të Prishtinës mundësinë të planifikojë e të punojë”, ka deklaruar Rama.

Në fund, Rama ka theksuar se asamblistët e Lëvizjes Vetëvendosje kanë votuar kundër buxhetit.