FC Prishtina ka zyrtarizuar transferimin e mesfushorit Arjanit Fazlija, i cili bëhet afrimi më i ri i bardhekaltërve për sezonin e ri.
Futbollisti 21-vjeçar vjen në kryeqytet pas një periudhe zhvillimi në futbollin gjerman. Së fundmi ai ishte pjesë e Greuther Fürth, ndërsa më herët ka luajtur edhe për ekipin U19 të Bayer 04 Leverkusen.
Hapat e parë në futboll i ka bërë në akademinë e FC Viktoria Köln.
Fazlija ka qenë pjesë e të gjitha grupmoshave të Kombëtares së Kosovës, duke veshur fanellën e përfaqësueseve U15, U17, U19 dhe U21.
Pas prezantimit si futbollist i FC Prishtinës, ai u shpreh i lumtur për transferimin.
“Është nder për mua të luaj për këtë klub me histori të pasur dhe për tifozët e tij të mrekullueshëm. Do të jap gjithçka për ekipin dhe kryeqytetin, në mënyrë që ta festojmë së bashku suksesin. Forca Prishtina!”, deklaroi Fazlija.
Me këtë transferim, FC Prishtina vazhdon kompletimin e skuadrës në prag të sezonit të ri, me synimin për të ndërtuar një ekip konkurrues për sfidat që e presin.