Prishtina merr një pikë ndaj Ballkanit, Llapi mposht Dritën

Sot janë zhvilluar dy ndeshje në kuadër të javës së 23-të në AlbiMall Superligën e Kosovës. Derbi ndërmjet Ballkanit dhe Prishtinës ka përfunduar me barazim 1:1, me dy gola të shënuar në fazën e fundit të ndeshjes. Të parët në epërsi kaluan portokallezinjtë e Suharekës, me golin e Sunday Adetuyni, në minutën e 83-të. Megjithatë, një minutë para përfundimit të ndeshjes, në minutën e 90+1’, Yakubu i Prishtinës riktheu baraspeshën në rezultat, duke siguruar një pikë të rëndësishme për skuadrën e tij.

Pas këtij barazimi, Ballkani vazhdon të renditet i dyti në tabelë me 40 pikë, por me 10 pikë më pak se Drita kryesuese, ndërsa Prishtina mban pozitën e pestë me 31 pikë.

E në ndeshjen tjetër, Llapi ka arritur një fitore të rëndësishme kundër Dritës, duke e mposhtur atë 1:0 në stadiumin “Zahir Pajaziti”, duke e ndalur kësisoj serinë pozitive të liderit të tabelës.

Goli i vetëm i ndeshjes u shënua nga Ardit Tahiri në minutën e 17-të, pas një asistimi të Benjamin Eminit. Pas kësaj fitoreje, Llapi ngjitet në vendin e shtatë me 26 pikë.