Presidenti i Federatës së Futbollit të Kosovës (FFK), Agim Ademi, ka bërë të ditur se në kuadër të Samitit Ekzekutiv të FIFA-s është takuar sërish me presidentin e FIFA-s, Gianni Infantino.

Përmes një postimi në rrjetet sociale, Ademi ka vlerësuar marrëdhëniet e shkëlqyera mes FIFA-s dhe Kosovës, duke theksuar mbështetjen e vazhdueshme që futbolli kosovar ka marrë nga organizata më e lartë e futbollit botëror.

Ai ka shprehur mirënjohje për presidentin Infantino, duke theksuar afërsinë dhe përkushtimin që ai ka treguar ndaj Kosovës, FFK-së dhe futbollit kosovar në përgjithësi.

Ademi ka falënderuar gjithashtu FIFA-n dhe UEFA për mbështetjen e vazhdueshme ndër vite, duke theksuar se kjo ndihmë ka qenë e rëndësishme në zhvillimin e futbollit në Kosovë dhe në arritjen e sukseseve të reja.

“Së bashku do të vazhdojmë të punojmë për një të ardhme edhe më të ndritur për futbollin e Kosovës”, ka shkruar Ademi.

Postimi i tij:

🇽🇰🤝🌍 Në kuadër të Samitit Ekzekutiv të Futbollit të FIFA-s, pata kënaqësinë të takohem sërish me presidentin Gianni Infantino.

Marrëdhënia e shkëlqyer e FIFA-s me Kosovën dhe mbështetja e vazhdueshme për futbollin tonë janë dëshmi e respektit që vendi ynë gëzon në familjen botërore të futbollit. Vlerësoj lart afërsinë dhe përkushtimin që presidenti Infantino ka treguar vazhdimisht ndaj Kosovës, FFK-së dhe ndaj meje personalisht.

Jam mirënjohës për mbështetjen dhe kujdesin e vazhdueshëm që FIFA dhe UEFA i kanë dhënë futbollit të Kosovës ndër vite, duke na ndihmuar në rrugëtimin tonë drejt zhvillimit dhe sukseseve të reja.

🙌 Së bashku do të vazhdojmë të punojmë për një të ardhme edhe më të ndritur për futbollin e Kosovës.