Presidenti i Federatës së Futbollit të Kosovës, Agim Ademi, ka vizituar FC 2 Korrikun me rastin e përvjetorit të themelimit të klubit, duke vlerësuar historinë dhe kontributin e tij në zhvillimin e futbollit kosovar.

Ademi theksoi se FC 2 Korriku mban me krenari emrin e 2 Korrikut 1990, datë që lidhet me Deklaratën Kushtetuese dhe që përfaqëson një nga momentet më të rëndësishme në rrugëtimin e Kosovës drejt lirisë dhe pavarësisë.

Gjatë vizitës, ai mori pjesë edhe në turneun e njomakëve, ku garuan klube nga të gjitha trojet shqiptare. Sipas tij, aktivitete të tilla shërbejnë për të bashkuar të rinjtë, për të krijuar miqësi dhe për të forcuar bashkëpunimin ndërmjet klubeve shqiptare.

Presidenti i FFK-së shprehu gjithashtu respekt për gjeneratat e futbollistëve që, në periudhat më të vështira të Kosovës, e mbajtën gjallë futbollin me sakrificë dhe përkushtim, duke theksuar se falë kontributit të tyre, të rinjtë sot kanë kushte shumë më të mira për zhvillimin e tyre sportiv.

Në fund, Ademi uroi FC 2 Korrikun për përvjetorin e themelimit, duke i dëshiruar suksese dhe vazhdimësi në misionin për edukimin dhe zhvillimin e futbollistëve të rinj.