Pasuesi i Alonsos, Reali zyrtarizon trajnerin e ri

Real Madrid ndërpreu bashkëpunimin me Xabi Alonson.

Pas këtij vendimi, Los Blancos ka vendosur që të zyrtarizojë trajnerin e ri.

Bëhet fjalë për Alvaro Arbeloa, i cili do të marrë menjëherë drejtimin e skuadrës.

“Real Madrid C. F. njofton se Álvaro Arbeloa është emëruar trajner i ri i ekipit të parë. Álvaro Arbeloa ka qenë trajner i Castillës që nga qershori i vitit 2025 dhe e ka zhvilluar të gjithë karrierën e tij si trajner në akademinë e Real Madridit që nga viti 2020. Ai drejtoi ekipin Infantil A në sezonin 2020–2021, duke u shpallur kampion i ligës, ekipin Cadete A në sezonin 2021–2022 dhe ekipin Juvenil A nga viti 2022 deri në 2025. Si trajner i Juvenil A, ai fitoi tripletën në sezonin 2022–2023 (Liga, Kupa e Mbretit dhe Kupa e Kampionëve), si dhe titullin e ligës në sezonin 2024–2025”, ka njoftuar Real Madrid.

“Si lojtar, Álvaro Arbeloa ishte pjesë e Real Madridit në një nga periudhat më të suksesshme të historisë së klubit. Ai mbrojti fanellën tonë nga viti 2009 deri në vitin 2016, duke zhvilluar 238 ndeshje zyrtare. Gjatë kësaj kohe fitoi 8 trofe: 2 Liga të Kampionëve, 1 Kupë Bote për Klube, 1 Superkupë të Evropës, 1 La Liga, 2 Kupa të Mbretit dhe 1 Superkupë të Spanjës. Me përfaqësuesen e Spanjës, Álvaro Arbeloa ishte gjithashtu pjesë e një epoke historike, gjatë së cilës fitoi Kampionatin Botëror 2010 në Afrikën e Jugut dhe 2 Kampionate Evropiane (2008 dhe 2012). Ai u paraqit 56 herë me fanellën e kombëtares”, thuhet në njoftimin e Real Madrid-it.