Organizata e Veteranëve të Luftës së UÇK-së (OVL-UÇK) ka bërë të ditur se do ta fokusojë veprimtarinë e saj në rrafshin diplomatik dhe institucional, në lidhje me proceset që po zhvillohen në Gjykatën Speciale në Hagë.

Në një komunikatë për opinionin publik, OVL-UÇK ka njoftuar se Kryesia, e dalë nga Kuvendi i 5-të i organizatës, i mbajtur në janar të vitit 2025, ka ndërmarrë një sërë aktivitetesh dhe iniciativash kundër asaj që e konsideron si padrejtësi në proceset e Gjykatës Speciale.

Sipas OVL-UÇK-së, organizata ka adresuar rreth 300 letra te personalitete të ndryshme ndërkombëtare, prej të cilave 285 u janë dërguar anëtarëve të Asamblesë Parlamentare të Këshillit të Evropës. Po ashtu, thuhet se janë zhvilluar takime me shumicën e ambasadorëve të vendeve mike të akredituar në Kosovë, si dhe me kryetarët e partive politike, me përjashtim të kryetarit të LVV-së.

OVL-UÇK ka përmendur edhe takimet e zhvilluara me përfaqësues ndërkombëtarë në Parlamentin e Zvicrës, Parlamentin Evropian dhe Vatikan, si dhe takimin me kryetaren e Veteranëve të SHBA-së, Carol Whitmore.

Organizata ka bërë të ditur se ka organizuar edhe një peticion me rreth 200 mijë nënshkrime, i cili, sipas saj, është dorëzuar në Gjykatën Speciale më 6 maj 2026, me kërkesë për drejtësi dhe trajtim të drejtë të proceseve ndaj ish-krerëve të UÇK-së.
Në komunikatë janë renditur edhe disa nga protestat dhe aksionet e organizuara në Prishtinë, Hagë, Tiranë, Strasburg, Maqedoninë e Veriut dhe Kroaci.

Duke iu referuar protestës së paralajmëruar për 12 shtator, OVL-UÇK ka njoftuar se ka marrë vendim që aktivitetin e saj ta përqendrojë në rrafshin diplomatik dhe institucional, ndërsa do të marrë pjesë edhe në aktivitetet e tjera që do të organizohen deri më 16 shtator.

“Ky vendim është marrë duke u bazuar në qëndrimin tonë të pandryshuar që nga themelimi i Gjykatës Speciale, pasi kemi qenë dhe vazhdojmë të jemi të bindur se ajo është një gjykatë politike dhe se proceset e saj vazhdojnë të jenë të ndikuara politikisht”, thuhet në komunikatën e OVL-UÇK-së.

Sipas organizatës, duke pasur parasysh zhvillimet e fundit dhe mundësinë e një vendimi me karakter politik, veprimtaria do të fokusohet në diplomaci dhe institucione.

Në të njëjtën mbledhje, Kryesia e OVL-UÇK-së ka marrë vendim për përjashtimin e anëtarit Skënder Llugiqi nga organizata. Sipas komunikatës, vendimi është marrë në bazë të Statutit të OVL-UÇK-së, për shkak të deklaratave publike të Llugiqit kundër gjeneralit Ramush Haradinaj, të cilat Kryesia i ka vlerësuar si shkelje të Statutit.