Osmani takohet me Parsons, merr ftesë për ceremoninë hapëse të Lojërave Paralimpike “Paris 2024”

Presidentja e vendit, Vjosa Osmani, ka pritur në takim presidentin e Komitetit Paralimpik Ndërkombëtar, Andrew Parsons, bashkë me presidenten e Komitetit Paralimpik të Kosovës, Njomza Emini.

Osmani e ka cilësuar si moment histori rastin ku Kosova për herë të parë do të përfaqësohet në Lojërat Paralimpike “Paris 2024”, teksa tha se shpreson në përfaqësim të denjë të sportistëve kosovarë në këto gara.

“Presidentja Osmani ka falënderuar për mbështetjen e deritashme presidentin Parsons dhe ka shtuar nevojën e vazhdimit të bashkëpunimit në funksion të krijimit të kushteve sa më të mira për parasportistët”, thuhet në njoftim.

Në anën tjetër, Parsons e ka ftuar zyrtarisht Osmanin që të jetë prezente në ceremoninë hapëse të Lojërave Paralimpike “Paris 2024” më 28 gusht.