Misetic: Provat e Speciales kundër Hashim Thaçit janë të dobëta, jam optimist dhe duhet të kemi aktgjykimin sa më shpejt

Avokati i ish-presidentit Hashim Thaçi, Luka Misetiq, ka folur para gazetarëve për rrjedhën e procesit gjyqësor dyvjeçar – kjo dëgjimit të të gjithë dëshmitarëve në Hagë.

Ai ka kritikuar mbajtjen e gjatë në paraburgim të Thaçit, Veselit, Selimit dhe Krasniqit, duke e quajtur të padrejtë dhe të pabazuar në prova të forta.

“Janë mbajtur në paraburgim për një kohë jashtëzakonisht të gjatë, 4 vjet e gjysmë,” ka deklaruar Misetiq.

“Kjo është një kohë që ata nuk mund ta kthejnë më mbrapa. Jam i zhgënjyer që u deshën dy vjet e gjysmë për të përfunduar paraqitja e provave të Prokurorisë. Besoj se kjo çështje mund të ishte mbyllur shumë më shpejt, por jemi aty ku jemi.”

Ai ka shprehur bindjen e tij se akuzat ndaj Thaçit nuk janë mbështetur nga provat e paraqitura deri tani në gjykatë.

“Në përgjithësi, mendoj se provat kundër Z. Thaçi kanë qenë shumë të dobëta,” ka thënë ai, duke shtuar se “në fund të gjykimit do të shihni se pretendimet që nisën me raportin e Martyt nuk kanë thuajse asnjë lidhje me faktet e paraqitura gjatë këtyre dy viteve.”

Duke komentuar mbi akuzat për përfshirjen e Thaçit në krime lufte, avokati ka theksuar se askush nga dëshmitarët nuk e ka akuzuar drejtpërdrejt ish-presidentin.

“Për mendimin tonë, provat janë jashtëzakonisht të dobëta deri në atë pikë që nganjëherë gjatë procesit e kam pyetur veten: ‘Pse është akuzuar Z. Thaçi?’” është shprehur ai.

Në përmbyllje, Misetiq ka theksuar rëndësinë e përfundimit sa më shpejt të procesit dhe shpalljes së aktgjykimit.

“Këtyre katër të akuzuarve u është marrë shumë kohë nga jeta dhe shpresojmë që ky proces të përfundojë sa më parë”, u shpreh Misetiq./Telegrafi/