Ministrja Nagavci ndan certifikatat për 32 trajnerë të zbatimit të Arsimit Dual në Kosovë

Ministrja në detyrë e Arsimit, Shkencës, Teknologjisë dhe Inovacionit, Arbërie Nagavci, mori pjesë në punëtorinë “Përmbyllja dhe Certifikimi i Programit për Trajnerë të Trajnerëve dhe Mësimdhënës të Praktikës Profesionale mbi Zbatimin e Arsimit Dual në Kosovë”, e organizuar nga MASHTI në bashkëpunim me GIZ.

Në këtë aktivitet u certifikuan 32 trajnerë nga shkollat e arsimit profesional, të cilët kanë përmbyllur me sukses fazën e fundit të trajnimit.

Në fjalën e saj, ministrja Nagavci vlerësoi angazhimin dhe kontributin e trajnerëve gjatë gjithë procesit, duke theksuar se certifikimi i tyre përbën një përgjegjësi të rëndësishme për bartjen e përvojave dhe praktikave të mira te mësimdhënësit e tjerë dhe për avancimin e zbatimit të Arsimit Dual në Kosovë.

Ministrja theksoi më tej se ndërlidhja e arsimit profesional me tregun e punës mbetet një nga prioritetet kryesore të MAShTI-t.

Programi i Arsimit Dual zbatohet në bashkëpunim të ngushtë me sektorin privat, me mbi 800 biznese të përfshira në të gjithë Kosovën, duke u mundësuar nxënësve zhvillimin e aftësive profesionale në kushte reale të punës.

Ky program realizohet me mbështetjen e GIZ-it dhe bazuar në praktikat e vendeve gjermanofolëse.

MAShTI mbetet e përkushtuar që, në bashkëpunim me shkollat, komunat dhe partnerët, të vazhdojë zgjerimin dhe forcimin e arsimit dual edhe me profile të tjera, në dobi të nxënësve, bizneseve dhe zhvillimit të qëndrueshëm të vendit.